Jowai: Ka Meghalaya State Kickboxing Association (MSKA) da pyntip ko wa hadien wa da yoh yarap poisa ko na ki kattu katni ki bru samen, ki sponsor, waka ram wa khian da pyntikna ko wow phah ya 2 ngut wa kynthup ya ka Ibadarishisha Mukhim, ka khynnah Class XII kawa puræ ha Laban Presbyterian School kawa chong wa sah ha Lumparing Dongsiej wa u Nathaniel Pynbianglang Kurkalang, u khynnah Class IX na St. Gabriel Higher School Upper Shillong uwa sah ha Mylliem Mawri daw mih ki na Shillong ha kani ka 12 tarik yow lai chimbynta ha ka WAKO Cadets & Juniors World Kickboxing Championship 2018 ka wow pynman ha Jesolo Lido,Venice Italy nadooh ka 15 hadooh ka 23 tarik uni u bnai.
Kini ki ar ngut toh kiwa da jop hapoh ki yakob hapoh ka ri mar arsien ha Raipur wa ha Delhi National Kickboxing and Federation Cup kamtæ da jied wow mihkhmat ki ya ka ri India.
Ka MSKA da pyntip ko leh wa ka toh kawa tipmit da ka WAKO India Kickboxing Federation kamtæ da ye ki wow chimbynta cha ki yakob wa pynman cha baar ri kawa pynman da ka WAKO International Federation (Hq. Italy). Kamtæ kiwi kiwa ym em hapoh ka seiñ MSKA hapoh ka jylla ym yoh ki wow ya chimbynta kam ha kini ki yakob wa heh.
Ka MSKA da pyntip ko leh wa ka 1st Meghalaya State Level Kickboxing Championship & 3rd State Level Kickboxing Selection Trial 2018 daw pynman ha Shillong nadooh ka 27 hadooh ka 29 tarik uni u bnai yow pynkhreh wow chimbynta ha ka WAKO India National Kickboxing Championship 2018 kawa daw pynman ha Kolkata nadooh ka 22- 25 tarik u Khonchonglad (November) 2018.
Discussion about this post