Phah u Dr. Roy ya u Conrad wow wanrah da ka rai wow pynpsiah ya ka ktien Khasi ha ka Eight Schedule

Jowai: U Lamphang ka Yung Dorbar Chna-aiñ ka jylla, u Dr. Donkupar Roy da phah u ya u Montri Rangbah ka jylla, u Conrad K Sangma wow wanrah noh da ka rai ha yung dorbar ka wow sdang nadooh ka 21 tarik uni u bnai, neibynta wow pynpsiah ya ka ktien Khasi ha ka Eight Schedule ka riti synchaar ka ri.

Hawa kubur yeini u Dr. Donkupar da ong u “Nga da yaklam O wa u Conrad wa ka sorkar toh u pynkhreh ko wow wanrah da i rai wow dawa pynpsiah noh ya ka ktien Khasi wa ka ktien Garo ha ka Khyrnit wa Phra ka riti synchaar ka ri.”

Yeini u Dr. Donkupar da ong u ha ka yalang phyllu yumut wa pynman da ka Khasi Authors Society (KAS) hajrong ka phang ‘Haba im ka ktien, im ka jaitbynriew’ kawa da pynman ha Khasi National Dorbar Hall, Mawkhar Shillong.

U Dr. Donkupar da ong u wa ym du kat ini wow pynpsiah ya ka tangwa wow pynchlur ya ki bru wo klam ki wei wow thoh ki dei ktien Khasi neibhah wa man ko ka luti wow kyntu kynrong ya ka ktien ka thylliej.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

“Boon ki bru jooh sñiawsuk ki wow klam dei pharæng namo dei ktien Sohra hawa wan ki cha sor hanlada man ki na ka jooh ka chnong namo ka thaaiñ du neidaw wa sarom ki, katwon tam won kitu kiwa em cha baar, ym em de klam ki dei Khasi tangwa dei ktien kiwi tawon,” da ong u.

Da ong u wa ym em eh wow pynpsiah ya ka Ktien Khasi ha ka riti synchaar wei kiwi kiwa emkaam ye wow leh won hadien deiwa e nongmuna wa ya ki district wa ki sub-division lada em i mon ka sorkar ye wow chna wei kiwa boon ye won wow leh hadien.

Da kyntu u leh ya kiwa thoh kot wa emkaam wow chim da kiwi ki jait ktien na ki chnong nongkyndong wow pynmahajon ya ka ktien Khasi.

“I mynjur ka sorkar jylla ya ka ktien Khasi wa ktien Garo ha u snem 2005 wow man kam ki ktien bynrap, toh wow pynchlur ya ki MLA wow klam da i ktien yong ki hi ha Yung Dorbar, tangwa ki MLA ym kwah ki wow klam da kini ki ktien toh wa sarom ki wei wa sñiaw ki wa ki paidbah daw yoobeiñ ki ya ki lada ymtip ki wow klam pharæng, wei nga sñiaw O wa ymtoh wow man ki kamtæ” da ong u Dr Donkupar.

Ha iwi tawon i liang u Dr. Donkupar da ong u wa i em ka KAS da yarap bha ko chiboon heiyatoh wa i ktien Khasi. “Nga jooh e yumut O wa emkaam wow em ki skur wow esikai ya ka ktien Khasi cha ki Garo wa ka ktien Garo cha ki Khasi, khnang wow pynsuk ya ki Khasi wa Garo wow yaklam khana ki heiyatoh kaam yong ki,” da pynrap u Dr. Donkupar.

Chwa ini u MLA ka Mawphlang u SK Sunn da ong u wa kam u MLA ka ka phang wa kongsan tam toh wow kreh wow pynpsiah ya ka ktien Khasi ha ka  Eight Schedule ka riti synchaar ka ri deiwa ong wa ka KAS toh u dawa ko na ka sorkar jylla wow pynbor ya ka sorkar pyrdi wow leh yeini.

Ka KAS da pynman ko ya kani ka yaphyllu yumut ynne ka sngi, kawa man leh ka sngi wow lehkmen ya ka sngi i tjoh i taar namo ka Literacy Day.

Ha kani ka sngi ya ka yalang da pynlai da u President ka KAS, u Dr. DRL Nonglait hei emlang kiwi kiwi.

U Dr. Donkupar wa u Sunn da pynlait ki leh ya soo tylli ki kot wei da pynkup burom leh ya ki khynnah kiwa pass bha ha ka ktien Khasi.

U Dr. Nonglait da pynbna u leh wa ka rally bah neibynta wow dawa wow pynpsiah ya ka ktien Khasi ha ka riti synchaar ka ri daw pynman ha ka 22 tarik uni u bnai ha Madan Iewrynghep, Shillong.