Jowai: Ka yung krehkaam ka District Disaster Management Authority (DDMA), West Jaiñtia Hills District, Jowai ha kani ka 13 u Naikhynde da pynman ko ya ka e sikai wa chisngi neibynta ki sahep wa kiwa kreh ka ka tnat Social Welfare, Child Development Project Office, kiwa kreh Asha, Aganwadi wa kiwi, hei yatoh wa kammon u e yarap ki ya ki bru wa em i duna hei doh i pran, ki khynnah khian kamjooh ya ki manbei wa pun-khon la jia wan i bor pynjæd tympra ka rymaw heiwon iwon i por.
Ya kani ka e sikai da pynman ha Conference Hall ka yung krehkaam u Deputy Commissioner West Jaiñtia, heiwa neiliang u sahep na ka District Disaster Management Authority, u Ebormi Langshiang hawa e yei ktien lamkhmat ong u, boonsien ki bru kheiñstiñ bha ki du wa sñiaw ya ka Disaster, wei wym jooh rap chimkhia ki leh u chim bynta deiwa sñiaw næ ong wa i bor pynjæd tympra toh ka mon u Blai tangwa hadien wada dep jia won kyruiñ ki cha ka sorkar wow yoh yarap, kamtæ da kyntu u wa toh u sñiawthooh wa toh ha ki bru samen samen wow em i kitkhlieh wa i yakrehlang.
Da kyntu u wow man kiwa chimkhia hei yatoh waki bor pynjæd tympra ka rymaw heiwa nyngkong toh u tip chwa u yarap pynya i hi, neitæ won yow yarap ya kiwi tawon wa chem chitom la ha yung næ chalait khnang wa i chah ktah ym wanrah ko yei doohnong wa boon.
Kamtæ neiliang ki bru chemphang wa e i sikai ha kani ka sngi wa kynthup ya ka I. Warjri Assistant Director, Good Governance Cell, MATI wa ka M. Langstieh, Assistant Professor, Disaster Management Cell, MATI da e ki yei batai bniah hei yatoh ki laad ki luti wa kammon u e yarap ya kiwa em i duna hei doh i pran ki khynnah khian kamjooh ya ki manbei wa pun-khon.
Discussion about this post