Da ka Call Attention u wanrah ka liang pyrchah ha ka 24 tarik hajrong ka tulop SSA

Shillong: Kiwa sikai skur SSA da chem chitom ki neidaw wympu yoh tulop ki kattu la 5 bnai kamtæ ka liang pyrchah ha ka yung dorbar chna aiñ ka jylla da pynkhreh ko wow wanrah da ka Call Attention ha ka 24 tarik uni u bnai kawa haap ha ki sngi man dorbar ka wow sdang nadooh ka 21 tarik uni u bnai.

U Chief Whip ka liang pyrchah ha ka yung dorbar, u Process T Sawkmie da ong u wa ka Congress daw wanrah ko ya ka Call Attention ha kani ka dorbar hajrong ini i chem chitom kiwa sikai SSA.

“Ymye de u sñiawthooh chibet ka sorkar da ong ko wa mynjur wow pyllait, chibet won da ong wa dang sahkut ha ka tnat muna poisa ka sorkar pyrdi wei i kwah i yei pynche,” da ong u Sawkmie.

Ha iwi tawon i liang uwa yahkhmat ka Congress da ong u wa ka sorkar BJP na Delhi da leh beinah ko ya ka Meghalaya neibhah pynbiej donhi ki ya kiwa sikai wei da pyllait ko ya ka tulop du chisien donhi ha uni u snem, i tæ mar ya dep chna ya ka sorkar Meghalaya Democratic Alliance (MDA) kawa emlang waka BJP.

Related posts

Ka NPP jop ko da ki kaam pynroi, ymtoh da ka poisa: Conrad

November 27, 2024

Ym ye wow tuklar yeiwa takit ha NEHU: Conrad

November 27, 2024

“Ka tulop kiwa sikai SSA wa pynlait ha uni u snem toh kawa da sahteiñ nadooh ka sorkar MUA-II wa yahkhmat da ka Congress ha ka jylla, wei ini toh du i pynbiej ya ki paidbah,” da ong u Sawkmie.

“Ha Meghalaya ka BJP waka NPP yakrehlang ki ha ka sorkar jylla wa ha Delhi wa synchaar da ka BJP, tangwa tang ya ka yong ki hi leh ym ye ki u pynbiang,” da ong chooh chooh u.

“Waroh chi kattu i klam yong u Modi da sñiaw la kamwa pdung kitæ ki myntoi ya ki paidbah, tangwa katni won da em du ki eh suda wa da yoo i nadooh i ku dor ki mar ki mata, i chitom ki warep hadooh kiwa sikai,” ong u Sawkmie.