Shillong: Ka Khasi Student Union (KSU) ynne ka sngi da pynman ko ya ka chong kyllaiñ myngor wow dawa naka sorkar wow pynbait noh ya u pood wa ka jylla Assam wei kamjooh wow pynsniaw yei pyrchah hajrong i chah pynyap u Tyngshain Mukhim ha uwi u Nepali uwa tip pyrtuid kam u Ramesh Thapa ha Madan Umwang, Ri-Bhoi District.
Hawa yaklam ynne ka sngi, u President ka KSU, u Lambokstarwell Marngar da ong u wa i yaklam pynbait pood waka Assam da toh wow leh hapyrdi ki montri rangbah yong kini ki ar jylla, ym du ha ki kyrdan ki Chief Secretary.
U Marngar da pynrem joor u leh yei chah pynyap yong u Tyngshain, wei da ong u wa ka sorkar jylla toh u phah noh ko da ki pulit wow yada ya ki Khasi kiwa chong chnong ha ka thaiñ khappood, wei heijooh i por da ong u wa ka seiñ daw lai yachem ko wa u montri rangbah ka Assam, u Sarbananda Sonowal hajrong ini i chem chitom ki Khasi kiwa sah ha khappood wa ka Assam.
Da ong u wa i wym em ki pulit cha ki thaw khappood toh wa kom ka sorkar jylla wei toh u kitkhlieh ka sorkar lada ka mih iwon iwon i jia sniawsih neidaw wym em ki pulit cha kini ki thaw.
U President ka KSU da ong wa ini i yalang lang ka seiñ ym toh wow pynmih ya kawon kawon i kulmar, wei i daw hi toh wow pynsniaw yei wym chimkhia wei wym ye ka sorkar jylla wow pynbait ya u pood u ang wow yada ya ki paidbah ha khappood tangwa ha kani ka chong kyllaiñ myngor won biang hi ki pulit wow sonteri ya ki.
Da ong u wa lada ka sorkar ka sniaw ko wa ym em pulit ko wow yada ya kiwa sah khappood toh u e bor ya kiwa chong chnong ha waroh ki khappood wow kieñ tiar ki wow yada pyn daki yaki hi.
Ha kani ka chong kyllaiñ myngor da yoh leh ya i klam na u Syiem ka Raid Nongtung, u President ka Synjuk kiwa synchaar chnong ka thaaiñ, u President ka KSU North Khasi Hills wa Jaintia Hills wei da chimbynta leh da kiwa chong chnong wa haap haka Block II wa kiwa ha yung u Tyngshain.
Discussion about this post