Shillong: Uwa yahkhmat warim ka Congress uwa man leh u symbood montri rangbah ka jylla, u Prestone Tynsong da ong u wa ka Congress da rem ko wow pynneh ya kiwa yahkhmat ka Party wow kheiñkor ya ka Party chwa ka Election MLA wa da dep, heiwa da sakhi ya kiwa boon ngut ki MLA yong ka party kiwa da mih noh.
“I mih noh u DD Lapang pynyoo wa da em iyi iyi wa bakla ha ka Party, khamtam wa man u u bru wa da em ha ka Party palat 40 snem tam wei da man u leh uwa yahkhmat wa rim dooh ka Congress hapoh ka jylla kamjooh hapoh ka ri waroh kawi,” da ong u Tynsong.
Da ong u leh wa kiwa mih naka Congress toh neidaw wym chah chkor wei wym bna kiwa yahkhmat ka AICC ya kiwa yahkhmat wei u Rahul Gandhi waka Sonai Gandhi kiwa ap du yei klam kiwi wei hadooh wym bien ki wow pynbait yei kyndad hapyrdi u PN Syiem wa u Dr. Mukul Sangma ha kitu ki por.”
Ha iwi tawon i liang u Tynsong da pyntip u wa ynne ka sngi da yachem u wa u Zoram Thanga u wa yahkhmat ka Mizo National Front (MNF) kam chibynta wow pynkhreh ya ka Election MLA ha katai ka jylla kawa daw man heiwa u Thanga da ong u wa kwah wow em ka NPP ha Mizoram wow yada wei wow pynku ya ka thaaiñ mihsngi.
U Prestone da ong u leh wa ka NPP da em ko ha Manipur, Assam, Nagaland, Meghalaya wei kattu sa ha Mizoram wei daw lai yalap Election u leh wow pyntikna wa ka Congress wow chah kyntait noh ko na Mizoram leh.
Discussion about this post