Jowai: U montri rangbahdooh ka ri, u Narendra Modi daw wai u ya ka Airport wa nyngkong dooh ka jylla Sikkim mynstep ka 24 tarik.
Hawa yaklam wa kiwa pathai khubor ha Gangtok chwa wow wan u Modi, u montri wa pait ya ka tnat Development of Northeastern Region (DoNER), u Dr. Jitendra Singh da ong u wa kani ka sngi daw man ko ka wow sah parom ya ka thaaiñ mihsngi wa ya ka ri waroh kawi. La 40 snem kattu ka Sikkim da man ko chibynta ka ri India, wei mynstep daw wan wai u montri rangbah ya ka Airport ka wow wanrah ya ka ha ka “Air-Map” yong ka pyrthai.
Chooh chooh u Dr. Jitendra Singh da ong u wa kani ka Airport em ko ha Pakyong, iwa jngai kamwa 60 km na u pood wa ka ri China iwa pynman leh ya ka kawa khamtam ya ki kaam yada ri.
Ka Indian Air Force (IAF) leh da chem ko wa kani ka Airport yarap bha ko wow pynhær wei wow pynhiar lieñsuiñ.
Heiyatoh wa ki kaam uiñke suwari, u Dr. Jitendra Singh da ong u wa kani ka airport daw yarap bha ko ya ka jylla Sikkim neibhah wa em boon tylli ki thaw wa yoosuk hapoh yong ka kiwa riñ ya kiwa boon kiwa uiñke na kylleiñ.
Deiwa em kani ka Airport i lai i wan daw pynsmat bha i yei por lai da 5 kynta neibhah ka Airport wa jan dooh em ko ha Bagdogra, West Bengal.
Ya kani ka thaw da chna hei dor T. 605 klur, wei i chna i chimpor i wow chna hadooh le namo soo snem.
(Photos courtesy : Airports Authority of India)
Discussion about this post