Cha ka Meghalaya High Court u lai ka AMTT lada ym pynduna ya ki Weighbridge hapoh jylla

Jowai: Ka seiñ Association of Meghalaya Traders and Transporters (AMTT) da ujor ko ha u montri rangbah ka jylla wow pyrchah yei boon ki Weighbridge hapoh jylla iwa ktah leh ya ki paidbah.

Ka seiñ da ong ko wa kam ka seiñ wa pynpoi ya ki mar cha kylleiñ ka ri wa kamjooh hapoh jylla, da chem ko wa i bai kit mar (transportation) dang toh i cha kiwi ki jylla bar hapoh Meghalaya neidaw wa em boon tylli ki Weighbridge wei i emkaam wow phah thaw kia bait hanlada lai na u jooh u sarokbah ka District.

Da ong ko wa ka sorkar da booh ko yei dor bait thaw khia namo Weighment Fee hadooh T. 200 man i iwa heh wei ka bai thaw toh u ryngkat i wa ki mar wa kit wei ymtoh u syad i.

Ka seiñ da pynrap ko wa i kaamram kini ki Weighbridge toh wow e ya ki Weighing Certificate kiwa chongdor du T. 2 donhi wei i dor wow chna ya ki Weighbridge leh toh iwa chisien donhi iwa daw khai katwa dang lai i por hapyrdi kiwa pynlai wa ka sorkar.

Related posts

Khut ka UDP-West Jaiñtia Hills ya kiwa kwah u yaleh MDC cha ka JHADC

November 25, 2024

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da e nongmuna ko wa i chna ya kawi ka weighingbridge toh T. 30,00,000 wei katkam i lai ki kari heh lyngba ka Toll Plaza ka NHAI man i ym duna ya ki 2000 tylli wei heipor lai mooyong palat 4000 tylli.

“Hawa kheiñ yei lut wa i dor wa kheiñ yeiwa yoh ka sorkar na kiwa pynlai pynyoo i lakam wa yachah ka sorkar ya kini ki bru samen hei naam wow e chakri wei ka lap wa yoh kini ki bru samen man i iwa heh,” da ong ka seiñ.

Da ong ko wa kini kiwa pynlai weighbridge yoh ki palat T. 14 klur katkam wa man i lai ki kari katni wei manda wai mooyong daw ku i archah.

Da kytnu ko ya ka sorkar wow pynhiar ya i bai thaw-khia cha ka T. 10 chi truck wei deiwa leh kamni kiwa pynlai (Licensee) u yoh ki T. 73,00,000.00 chi snem wei daw ku i manda pynlait mooyong.

Da ong ko leh wa i dor sorkar wa chim toh u pynhiar yow myntoi ki paidbah neibhah hawa em ki bru samen kiwa pynlai wa ekti ka sorkar ki da yoh lap bait chwa ki tangwa heini yoo mar dei kylla.

Kamtæ ka seiñ da kyntu ko wow hukum wow booh du kawi donhi ka Weighbridge ha kawi ka district wa u sarokbah wei wow sdang chwa na East Jaiñtia Hills hapyrdi ka Rtacherra wa Khliehriat, neibhah katkam wa man katni em ar tylli ki weighbridge kawi ha Umtyra wei kawi ha Rtacherra ha u sarok NH 44 (katni wa tip kam u NH 6) kamjooh leh ha West Khasi Hills, heiwa em ar tylli ki weighbridge na Mawpun hadooh Riangdo.

Ka seiñ da maham ko leh wa lada ka sorkar ym leh ko iwon iwon hajrong ini daw lai choh noh ka AMTT ha dwar ka yung kasari.