Ujor ka JSM yei sepai yei mynsien uwa 12 snem uwa chah riñ bordiñ ha u sainar wa lai na yung skur

Jowai: Ka Jaiñtia Students’ Movement (JSM) da ujor FIR ko wa ki pulit ka Lad Rymbai OP, EJH wa ha ka 4 tarik uni u bnai heipor kamwa 2 waje i sngi da em u khynnah wa dang 12 snem uwa tip kam u Mardeiwi Rymbai da dooh u yei mynsien yong oo hadien wa ku u wow li tooh ya ki tiar kyndehke wa chna dei khyndaw kam ki moo marble wa that u ha tnoom yung ka Government Lower Primary School, Khliehmyntriang kawa haap hapoh ka Lad Rymbai OP.

Ka seiñ da suba ko wa ini da jia i neidaw wa tynkhooh u wa u sainar bordiñ wa lai na tnoom kani ka yung skur.

Ka seiñ leh da ong ko wa man ko kawa khlem akor wow pynlai ya u sainar bordiñ pyn na khleih yung uwa jngai du kamwa 3 phut na tnoom yung khamtam ha ka yung skur iwa da booh yei maa ya waroh ki khynnah skur khem rah ya uni u sainar bordiñ cha neiñ deiwa booh ya ki chrot bordiñ.

Kamtæ da kyntu ya ki bor ka aiñ wow pynman ya ka takit wei wow pynchitom ya kiwa leh bakla.