Jowai: U General Secretary ka UDP West Jaiñtia Hills District Unit u Kitboklang Nongtdu uwa man leh kam u Convener ha ka yalang wow pynkhai im biang ya ka party ha ka Jowai Central MDC Circle, wa pynman ynne ka sngi ha Conference Hall ka Infinity Restaurant, Jowai da ong u wa i thong ka UDP ym toh du wow pynyieñ MDC wa MLA lada jop la rem leh tangwa emkaam ya kiwa yahkhmat wow pait wow pynkhlan ya ka Party kamjooh kiwa mihkhmat wei ym toh wow mylliñ ya kiwa kreh ka Party.
Kani ka Jowai Central MDC Circle toh kawa da yap hadien wa mih kiwa pait ya ka napoh ka Party wei u Kitboklang Nongtdu da ong wa emkaam kiwa kreh kiwa ym chet wei kiwa ym kynthiar cha kiwi ki Party.
Da ong u leh wa ki seiñ saiñ pyrthai ri-loom katni man ki kiwa khlan ym du heiwa jop ya ki Election chiteiñ samoi wei kamjooh ki MLA kiwa dadep pynyabi waka UDP wei daw em leh sa le ngut ki MLA kiwa daw leh ya ini.
Da ong u leh man ko i kithlieh yong waroh ki MLA ka party kamjooh ki kyrtong ka party wow pyntikna ki wa ki Circle kamjooh ki Primary Unit u man ki kiwa im wa kiwa krehkaam.
Neiliang ka UDP da ong ko leh na ki Constituency wa jop MLA ko da yooluti wow jop lut ha kani ka Election MDC.
Ha kani ka yalang da jied ya u Timothy Phawa kam u President ka Jowai Central MDC Circle, u Suk Dkhar kam u Vice President, Assistant Secretary u Salanmi Kharshiing, wa 10 ngut ki Executive Member u Manly Dkhar, u Sam Chyrmang, u Ruhipaia Suwer, u Rophos Lipon, u Jerlang Lakhon, u Dud Laloo, u Daribiang Passah, u Da-O Toi, u Dero Shylla wa u Emi Shullai.
Discussion about this post