Jowai : Ka yakop yalehke Football wa pyllai daka Jalapang Sport Club Wahiajier West Jaiñtia Hills District, kawa da tip kam ka 2nd Open To All Football Tournament 2015 dapoi ko cha ka yakhun khaddooh (Final) ynnin ka 4 tarik u Duitra ha Mini Stadium yong ka chnong Wahiajier.
Ya kani ka yalehke da sdang nadooh ka 23 Khonchonglad 2015, ha kani ka yalehke da wan u chim bynta hadooh 28 tylli ki dhab.
Ha ka yakhun khaddooh da yachem ka 1571 FC pyrchah ya ka SPS XI FC.
Ha ka yalang wa tbian kiwa pyllai ya kani ka lympung yalehbol da khana ki wa i thmu yong ki u pynman ya kani ka yalehke toh chibynta u pynmih poisa yow e yarap ya ka thaw ri khonswet wa em ha kani ka chnong.
U kongsan ma A.M. Lyngdoh BDO ka Thadlaskeiñ hei klam u kam u kongsan da yaroh u ya kiwa pyllai wa lyngba kani ka yalehke em ki i thmu wow yarap poisa yei thaw ri khonswet kawa man kawi na ki kaam wa bha tam. Hei yatoh won wa ki wanchim bynta næ ki player da kyntu u wow sai ki yei sap wei u yakhun leh katkam ka kyndon. Da wan u sakhi lang ya kani ka yalehke da u OC I/c Ummulong Beat House, u Waheh Chnong ka Wahiajier u ma K. Shylla, u ma W. Suting I/c Nartiang Police Outpost wa kiwi ki waheh deilang wa ki paidbah wa boon.
Hawa kyruiñ cha ka yakhun hapyrdi kini wa poi cha ka Final, ha ka kylla step ka SPS XI da yoh ko u thap nyngkong ya ka kool ha ka minit wa 25 lyngba u Samson Nongrum Jersey No-17. Ka 1571 FC da pyrchang ko u yoh pynuiñ kylla ya katai ka kool kat u yoo hadooh wa kut ka kylla step leh em ye ko.
Hadien kattu kani minit wa sdang ka kylla miet ka 1571 FC leh da yoh ko u thap chi kool ha ka minit wa 46 lyngba u Niwan-oo Gatphoh Jersey No-14. Hadien ka kool ka 1571 FC ka SPS XIFC leh da rap pynkhlan ko ya ka yakhun heiwa da yoh biang ko u thap 2 kool ha ka kylla miet lyngba u Victor Shadap Jersey No-7 haka minit wa 54 waka 62 wei da kini ki kool da jop ko ya ka 1571 FC 3-1 wei da yoh ko leh u rah ya ka song poisa wa T. 2 lak tyngka katwa ka 1571 FC ka kynhun wa chahrem yoh ko T. 1 lak tyngka.
Discussion about this post