Paris: U montri rangbah ka jylla, u Conrad K. Sangma wa u montri wa chnat i rep i riang, u Banteidor Lyngdoh wa kiwi ki sahep ka sorkar ylla da lai embynta ki ha ka SIAL (Salon International de l’alimentation) Paris 2018, kawa man kawi na ki tamasa pynyoo baam wa heh tam ha pyrthai.
I embynta ha ka SIAL toh hadien wa sdang ka jylla ya ka Directorate of Food Processing wow kyntu kynrong ya i rukom song baam hapoh jylla.
Neiliang u Conrad da ong u wa emkaam wow sñiawthooh yei kwah ki bru wei da embynta ki ha kani ka tamasa wow yakrehlang wa ki karkhana namo ki Company wow kreh ha kani ka bynta.
Ha uni u snem ka ri India, daw pynman ko ya ka ‘Food India by SIAL’ ha sorbah New Delhi wow pynyoo ya ki jait baam wa ha rukom wa em hapoh ka ri kam kawi ka laad wow e khih e kreh. Ka montri ka sorkar pyrdi wa pait ya ka Food Processing ka Harsimrat Kaur Badal leh da embynta ko ha kani ka tamasa heiwa da ko ya i dukan ka ri India hei emlang u Conrad wa u Banteidor.
“Ka pyrthai da sñiawthooh ko yei bor ka ri India heiyatoh wa i rukom song baam (Food Processing) ei man i iwa emkaam ya i wow tooh bniah i kammon leh kiwi ki ri kiwa da stat wow paan yarap na ki heiyatoh wa kani ka bynta. Kyrmen i wa deiwa yakrehlang wa kiwi ki ri wei daw ye i wow pynheh dor ya ki mar wow pynlai yaaw ya ki ha kylleiñ ka pyrthai,” da ong u Conrad.
Da pyntip u wa ka Meghalaya thooh ko ya ki stat ka juk katni, wow pyndap pynbiang yei emkaam kani ka tnat.
Da kyrmen skem u wa hapoh ka ‘Pradhan Mantri Kisan Sampada Yojana’ yong ka sorkar pyrdi, ka jylla Meghalaya daw yaleh ko katwa ye wow chim kabu ya ki laad yarap na ka Ministry of Food Processing.
“Ka SIAL da e laad ko ya i wow yachem wa ki bru chemphang ha kani ka kaam na kylleiñ ka pyrthai, wow tip yeiwa dawa ha kani ka kaam, i chemphang wa kiwi kiwi,” da ong u Banteidor Lyngdoh.
Discussion about this post