Jowai: Ka seiñ Association of Salesian Cooperators (ASC) Shillong Province yong ka Balang Catholic, kamwa leh khlieh snem da pynman ya ka yachemlang haki thaw waphær waphær watip kam ka Annual Congress Meet.
Ha uni u snem won kani ka yachem lang rap man kyrpang ko neibhah da khynjoh ko cha u moomær dap 40 tylli ki snem namo ka Ruby Jubilee i yachemlang heiwa da pynman ya i lehkmen ha St.Mary Mazzarello Convent Jowai.
Kani ka seiñ Association of Salesian Cooperators Shillong Province kynthup ko ya ka Garo, Agartala, Shillong Diocese, Jowai Diocese wa ka Nongstoiñ Diocese wei man ko leh ka seiñ wada sdang da u Don Bosco hajrong ka yurim wow kreh yei kaam wabha haka imlang sahlang.
Ya kani ka yachem lang wa 40 da pynman ya ka arsngi lyntær nadooh ka 27 waka 28 tarik uni u bnai wei da wan wow chim bynta leh kamwa 18 tylli ki Centre wa em na waroh kawi ka Provience.
Haka sngi sdang yong kani ka yachem lang nyngkong da pynhær ya ka lama ka seiñ da u Father H. Lamare uwa man u Parish Priest ka Jowai wei heijooh i por hawa e u yei kyntien sneiñ kyntien da ong u wa kam ka seiñ toh u kylli ko wa ha kitai ki 40 snem chadien iyi de da leh ko? Wei da kyntu u wa neini chaphrang u pyrkhat ki wow leh kiyi kiyi wa rap bha chooh chooh neibynta i bha i miat ka seiñ, ka Balang waka imlang sahlang hi waroh kawi.
Hadien ini won da em ka yalang heiwa wada yoh i klam wei rwai pdiang naka Jowai Centre wei pynkop ya ka charak wada pyndep da kiwa krehkaam niam kam ki Father waki Sister natlor kiwi won ki kaam pynwyrngia hajrong ka phang wada pynchong yurim naka Gospel u John 4:15 kawa ong “Sir give me this water”.
Discussion about this post