Jowai: Ka General Meeting ka JSM ha uni u snem da man ko kawa chit neibhah waroh ki dkhot, ki Unit waphær waphær da wan chimbynta kawa da pynman ha ka 30 tarik uni u bnai wa da dep ha Community Hall ka chnong Khliehmyntriang.
Ya ka yalang da pynlai da u President Rangbah ka seiñ, u Leningstar Rymbai heiwa da puræ ya ki bui krehkaam (Annual Report) na waroh ki Unit wa ki Circle ka seiñ.
Hadien ini da yaklam yillu hajrong ki phang wow kreh ka seiñ neibynta u snem 2018 wa kiwa dang sah khamtam i dawa College sorkar hapoh East Jaiñtia Hills kawa da sahteiñ nadooh u snem 2016 wei hajrong ini ka seiñ da rai ko wow yakhun khlem chong ngiah.
Ka seiñ da pdiang ko yei yoh ya ka Community College kamwa da da mang da ka sorkar jylla wow booh ha waroh ki District hapoh ka jylla tangwa ka Community College yaphær ko na ka Government College.
Ya ka Greater Water Supply Scheme Rymbai (Phæ Phæ) ha ka General Meeting ka JSM da rai ko wow ksoh yeiwa kular u DC warim u MS Lhuid.
Ka JSM ha kani ka dorbar da rai leh wow yachem ya u Montri Rangbah ka jylla wow yaklam hajrong ki phang wa kynthup ya ka Government College, wow pynku kyrdan ya ka Laskein C&RD Block cha ka Civil-Sub Division, u booh ya ka Police Outpost ha ka thaaiñ Block -I, Huroi-Hingaria, Bataw Lakadong wow pyndooh ya ka Municipal ha Jowai wa kiwi kiwi.
Ha kani ka General Meeting ka JSM da pynkha ya ka chnat krehkaam kawa tip kam ka JSM Ladrymbai Unit .
Da pynkup burom ko leh ya u dkhot ka seiñ, u Anthony Sumer deiwa e ya ka Appreciation Certificate chwa wow mih noh u na ka seiñ u wow yakhun Election deiwa yaroh ya ki kaam wa da leh u.
U Anthony da man u kam u President ka JSM Narpuh Circle ha u snem 2014, ha ka General Meeting 2016 da pyndam noh ya ka Narpuh Circle wei da man u kam u Financial Secretary hapoh ka Central Body wei da ekti leh ha oo wow chna ya ka Hostel Boys Room NEIMA ha Sahsniang.
Discussion about this post