Jowai: Ka Khasi Students’ Union (KSU), da dap ko dei sñiaw phylla hadien wa yoo ko lyngba ki khubor wa ka sorkar da rai ko wow wanrah ya ka rai namo ka Resolution wei da mynjur wow pynkrehkaam ya kani ka Resolution hajrong ka ktien Khasi tangwa ka seiñ sñiaw ko wa kani ka Resolution dap ko da i duna wa i wym biang kawa ye u wanrah ya i sah doom hajrong kani ka phang kawa da angnood wa da boon snem kattu da ki dkhot yong ka jaitbru wa ka ktien Khasi u psiah noh ko hapoh ka 8th Schedule ka riti synchaar ka ri India.
Ha i por wa da mynjur wow pynkrehkaam ya ka Resolution da em i kyrmen wa ini waroh u man kaam noh i neidaw waroh ki MLA da mynjur lang ki ya ini tangwa ka seiñ da ong ko wa sñiaw diaw ko wow ong wa du ha kini khajiak tayaw da chem wa ka Resolution ym em man ko kawa janai wei em ko boon ki duna wei ya kam kani ka kaam wa da dawa da ki phaw snem toh u sñiawthooh ka sorkar wow pynbait pynryntih yow lait ka rai u man kawa tkoh.
Ka seiñ da sñiaw ko wow phah ya kani ka kyrwoh cha ka sorkar jylla wow khut ko u pynman ya ka Dorbar wa kyrpang yow ya phyllu yumut biang yow pynbiang ya iwa duna wei wow wanrah biang ya ka Resolution sa chisein wei wow mynjur biang ya ka yow lait ko u man kawa tkoh.
Ka seiñ da ong ko leh wa da yooluti wa kani ka Resolution toh kawa da poi cha Delhi tangwa da man ko mar dei khangtleiñ neibhah dang sahkut ko ha soo kynroh yong ka yungdorbar chna aiñ.
Lada ka sorkar ym khut smat ko ya ka Dorbar wa kyrpang hajrong kani ka phang, pynyoo wa ka sorkar da chukor wei pynbiej donhi ko ya ki bru deiwa mynjur ya ka Resolution kawa ym biang.
Ini toh katkam wa pyntip u Lambokstarwell Marngar, President KSU.
Discussion about this post