Jowai: Ka yutip wa dang yoh na NEIGRIHMS da ong wa ha ka 8 tarik uni u bnai da wanrah ya ka Agnes Kharsiing heipor 6:00 waje i janmiet cha kani ka thaw sumaar heiwa da em ko boon ki kha ha kylleiñ i doh i pran yong ka wei ym em yong bru ko.
I kih ki thied snaam (Pulse) ko man i iwa tlot bha wei ka Blood Pressure (BP) kawa wym ye u chem wei chemchitom ko wow riñ mynsien. Hadein ini da e ya ka ya ki jait um (Fluid) wa emkaam ko wei da e snaam leh wei da sdang ko u chait.
Da leh ya ka Emergency CT Scan neibynta i khlieh, rupai wa u kpoh wei da chem wa lang snaam ha jabien, wei em ki chiyieñ chrooh (Ribs) yong ka kiwa kheiñ.
Ynne ka 13 tarik heipor 2 waje i sngi ka Agnes da che yong-bru ko hadien 5 sngi wei i dohjem yong ka kam u Kidney leh da sdang khlan biang u, ki snier ko leh da rap hoi ki wei kamjooh leh waroh kiwi tangwa dang booh hi ya ka ha ki Ventilator wei dang em hi ko hapoh ka Intensive Care Unit.
Ka lok yong ka won ka Amita Sangma da takha ko na kiwa boon i bynta i khlieh ko, pynar ki kti ko wei joor ki kha ha ka kti timun heipor wa wanrah ya ka tangwa em ko i bynta wa chait wei ye hi ko u klam wei u baam.
Discussion about this post