Jowai: Ha kani ka sngi pynsiñ ka 25 tarik u Naisaphra u 2015 da chna ya kawi ka seiñ ki khynroo khyllood kawa da e pyrtuit ka Jaiñtia National Volunteers ha kawa i kyntien im sngi yong ka toh “Chitylli yow Im ka Ri”. Ki nongkitkaam yong ka toh : President u Palmon Sari, Vice President u Wanlang Chyrmang, Genaral Secretary u Arlangki Shylla, Finance Secretary u Heibor Pariat, Education Secretary u Strong pillar Talang, Sports Secretary Soloman Pakem, Cultural secretary Da Oo hi Shylla, Organising Secretary Jersom Shylla, Publicity Secretary Showmiki Phawa, katwa ka I. Niangti kam ka Incharge Women’s wing.
Ha chwa u pynskem ya ki nongkitkaam kani ka seiñ thymme da em chwa i klam i pynche da uwi na ki khynroo u Heibor Pariat heiwa da khana u yei daw wa duk u seiñ næ pynmih sa kawi ka kynhun wow kreh nei bynta i bha i miat ka imlang sahlang. Ha ini i pynche yong u H Pariat da ong u wa heisakhiat mut ki u pynthymme nongkitkaam ynne ka sngi hapoh i pyrtuit ka seiñ Niaw Wasa Youth Federation kawa da ya kreh ki ha kini ki bnai wa dep, tangwa katda mih noh i wym ya sniawthooh jingmut para nongkitkaam, wei em leh ki nongseiñ wada iehnohkaam ki wei da psiah da chna kida kiwi ki seiñ, wei da mih sa i ya kynnoh kynta para ki.
Kiwon, katwa em i thrang ki u chakri ya ka jaitbru ym kwah ki u ya kdaw kti u ya kynnoh yow won uwon, kamtæ sniawtoh noh ki u em da kawi tawan ka seiñ thymme ha kawa u khylliap u mih noh ki na ka NWYF. Kamtæ da rai ki u pynskem da i pyrtuit Jaiñtia National Volunteers. Ha chwa u pynskem ya ki nongkitkaam kani ka seiñ JNV da ioh chwa ya ki kyntien sneiñ kyntien kyntu na ki kattu katni ngut kiwa waheh wada chah khut sniawbha u ya emlang u sakhi ya kani ka sngi, kam na u Dameki Paswet President HYC JH, u Rikito Nongtdu ex President JSU, u Collin Laloo ex President JSU, u bah M Swer, u Jersom Shylla, u C H Passah wa na u Sannio Siangshai. Ya i pynspær soskular ya ki nongkitkaam wa i pynskem ya ka seiñ JNV da leh da u Chaphrang H Passah. Ya ki kyntien sniawngooh da pachat da u Arlangki Shylla, ya ki kyntien kyrkhu da e da u Rikito Nongtdu.
Ia kani ka pynskem nongkitkaam da leh khmat tre u Mot Woh Kiang Nangbah, madan Syntuksiar.
Discussion about this post