Jowai: Ka seiñ Jaiñtia PWD Muster Roll Workers & Labour Union (JPWDMW&LU), da dep e ko ya ki mat wa dawa neibynta i biang i dap i manbha man miat ki Muster Roll kiwa kreh ha ki chnat ka sorkar jylla Meghalaya, ya kini ki dawa da e lyngba ka dorkhat (Memorandum) nadooh ka 05-09-2018 ha kti u Prestone Tyngsong Deputy CM uwa pait ya ka Labour Dept., wa ya kani ka jooh ka dorkhat da dep e leh ha ki Montri wa ki MLA ka ri-loom Jaiñtia.
Kattu da tam la ar bnai nadooh wa dadep yaklam wa u montri wa emburom ka sorkar jylla, tangwa hadooh kini ki sngi neiliang ka sorkar jylla suki bait ko, kat hadooh wa da haap ka seiñ u pynkynmoo biang ha kini ki sngi kiwa da dep, cha u Deputy Chief Minister ka sorkar jylla wa ki montri wa ki MLA hajrong ini.
I dawa iwa da booh hakhmat u Prestone Tyngsong, toh u pynku kyrdan noh ya ki Muster Roll cha ka RCW ya kiwa da kreh chiphaw snem pura chaneiñ, yow pynku ya ka nongsngi cha ka T. 300 chisngi kamwa da tyrwa da ka tnat Labour (ha u Naiynru 2018) na ka T. 189 chi sngi kawa da su ki kattu katni tylli ki chnat sorkar ha ri-loom Jaiñtia haduh u Naisan(May) hadooh u Naiynru (June) 2018. Kamjooh yow e chuti wa i su nongsngi ka sorkar jylla ya ki muster Roll ki manbei ha ki sngi wa dang yoh khonboo ki, neitæ da dawa na ka sorkar jylla wa u pynkrehkaam pura ko ya ka Meghalaya Regularisation of Casual Workers Scheme 1996. Natloor kitai ki dawa, dang em chooh sa kiwi tawon ki emkaam neibynta i bhalang ki Muster Roll.
Ini i wym mano ka sorkar jylla ya ki mat dawa ka seiñ kawa da e cha ka, da pyndiaw bha ko ya ka seiñ, khamtam kattu neini wada toh i por u su bai skur ya ki khon ki pyrsa ki Muster Roll, iwa rap sñiawsih chooh chooh wow tip wa ka sorkar jylla da su ko ya ka bai nongsngi hadooh u Naisan wa u Naiynru 2018, neitæ hadooh uni u Naichiphaw ym em de u su ko.
Kamtæ, neiliang ka seiñ da rai ko wa u khut ya waroh ki Muster Roll kiwa kreh ha kylleiñ ki chnat ka sorkar jylla ha waroh ka ri-loom Jaiñtia, yow yachem ha ka 24-11-2018 heipor 10:00 waje istep ha Yungwalieh ka Tpep-Pale Jowai yow yaklam deiwa rap khor ya ini i leh beiñ ka sorkar jylla ya ki Muster Roll kiwa da kreh ha sarok namo ha office, iwa ha kini ki sngi chem i, iwa lada ym em Muster Roll wa kreh, u sarok da syrtap da ki phlang ki rnem, ki thlu, ki dooid da sahkut da i tngit i jhep.
Han la kattae leh ka sorkar jylla ym bna ym pyrwa ko ya i eh i khoo iwa chem ki Muster Roll, iwa hadooh kini ki sngi ka sorkar Meghalaya toh kawa su bai nongsngi du T. 189 chi sngi, kani ka bai nongsngi toh kawa khian dooh na waroh ki jylla ha Ri India kiwa su bai nongsngi ya ki Muster Roll.
Ini toh katkam wa pyntip u K. L. Pariat, President JPWDMW&LU, Jowai.
Discussion about this post