Hadien wa kular u Conrad wow su 50% chwa ka Khristmas ya iwa dawa kiwa kreh ASHA, pyndam yei chah thngan

Shillong: Ka seiñ yong kiwa ka chnat ka chait ka khiah, ki Accredited Social Health Activist (ASHA) hapoh ka chatri yong ka Meghalaya ASHA Workers Union (MAWU) ynne ka sngi da yalang ki ha Shillong wow pynman ya ka yakhih chah thngan khlem booh por neidaw wym mano ka sorkar ya ki le tylli ki dawa yong ki. Ya kani ka yakhih da sdang nadooh i por 10 waje i step ha thaw pynyeiñ kari ka Additional Secretariat, Shillong.

Hawa yaklam wa kiwa thoh khubor, ka General Secretary yong ka Meghalaya ASHA Workers Union, ka Mira June Myrsing da pyntip ko wa kiwa kreh ASHA da dawa ki na ka sorkar jylla wow pynkrehkaam ya ka ASHA Benefit Scheme kawa toh u yoh ki nadooh u snem 2014 wa ya ka Meghalaya Maternity Benefit Scheme kawa kiwa kreh ASHA toh u yoh ki nadooh u snem 2012 nalor wow su ya ka bai lai bai wan yong ki.

“I pyrchah joor i yei leh khlot ka sorkar jylla hajrong ki 3 tylli ki phang dawa kiwa kreh ASHA ki wym yoh hadooh katni hadien wa da dep lai pynsniaw cha ka sorkar na i por cha ki por lyngba u montri ka chnat ka chait ka khiah,” da ong ka Myrsing.

“Ki ASHA toh kiwa wan na ki manyung wa dooh wa duk wei nalor wa i hap kreh i cha ki thaw nongkyndong, i chem chitom i wow pyndap ya i emkaam nadooh ka bai lai bai wan hanlada em ha i kjut i chitom,” da ong chooh chooh ko.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Ka General Secretary ka Meghalaya ASHA Workers Union da ong ko wa ka sorkar jylla toh u su noh ko ya waroh ki bhah wa ki toh u yoh ki na ka sorkar jylla neibhah hadooh katni ya ini i su ya ki ASHA dang yoh du na ka bhah ka sorkar pyrdi.

Ha kani ka sngi sdang ya ka chah thngan, ki wa kreh ASHA da chong bait ki smam hadooh wa miet, wei da em leh kiwa yah lang wa ki khon ki kti dei thmu wow pteiñ ya i chah thngan katwa ka sorkar ym ap ko yei dawa yong ki.

Tangwa hadien kattu katni por wa kut ka dorbar kyrpang ka sorkar jylla, neiliang u montri wa pait ya ka chait ka khiah, u AL Hek da khut u wow yaklam wa ki ASHA hanlada ym ye u e i kular iyi iyi leh wei da hap yang hadooh wa yaklam wa u montri rangbah, u Conrad K Sangma.

Hadien wa yachem wa u Conrad neiliang ka Meghalaya ASHA Workers Union da pynbna ki wa u sangeh noh chwa ya ka yakhih hadien wa u Conrad kular u wow su chwa 50 percent na ki dawa ha u Kmaichonglaad (Dec) wei ya kawa sah u pyrchang wow pyndep ha u Wisu (March) u snem wow wan.

“I da rai i wow sangeh chwa ya ka yakhih hadien ba u montri rangbah da kular u wow pynlait chwa 50 percent na ki dawa yong i ha chwa ka Khristmas,” da ong kawa yahkhmat ka MAWU.