Jowai: Ka AJYWO Central Body, ynnin ka sngi hapoh i yahkhmat u M.H. Dkhar, President wa u Reachingson Siangshai, Vice President ka seiñ, da lai yachem ki ya u Deputy Commissioner ka West Jaiñtia Hills hajrong u khloor Martial Arts ha ka pyrthai, uwa na ka ri-loom Jaiñtia, u Ferdinand Suchiang uwa da yoh hadooh 4 sien ya ka Takma Ksiar ha ki lympung yakob yalehke Martial Arts (Jeet Kune-Do) yong ka pyrthai.
Ha i yachem, ka AJYWO da ekti ko leh ya ka dorkhat wa 29 sla kawa da thoh ya ka parom wa ki kaam wa i jop Takma Ksiar u Ferdinand Suchiang ha ka yakob yalehke Martial Arts (Jeet Kune-Do) ka pyrthai kiwa da lai chimbynta u ha u 2017 wa 2018 ha ki bynta waphær waphær ka pyrthai.
Ha i yaklam, ka seiñ kam chibynta wow pynchlur ya oo wa ya kiwi ki khon khynroo khyllood ka ri-loom Jaiñtia, da kyrpaad ko ya u DC yow e yarap ya u Ferdinand Suchiang, heiwa neiliang u DC leh da kular u wow leh yeiwa emkaam neibynta u Ferdinand.
Ka seiñ da ong ko leh wa i yoh takma ksiar u Ferdinand Suchiang hadooh 4 sien ha ki lympung yakob yalehke Martial Asts (Jeet Kune-Do) ka pyrthai man ko i wow sñiaw sarong ya ka ri Jaintia, ka Bri u Ynniaw Trep wot ya ka ri wa ka jylla waroh kawi.
Kam wow pynkynnoo heini u Ferdinand leh da yoh u ya ka (1) “Diploma Certificate of Qualification as the Coach of WAKO India and Licensed as Grade-A Coach”; (2) “Certificate for attending the Coaching Course for Wushu Coaches 2018”; (3) “Certificate for Completion the Course of International Referee and Judge Seminar set to the Highest Standard” wa ka (3) “Certificate for Completion of the International Seminar in Traditional Boran & Muay Thai Advanced Training Camp set to the Highest Standard”.
Discussion about this post