Jowai: Ka lympung yalehke football wa tip kam ka 14th Invitation Knock Out Football Tournament ha Wahiajer wada pynman da ka Maya Sports Social Arts & Cultural Club da poi ko chawa kut ynne ka sngi.
Ha kani ka Final, ka Ummulong SC da pynrem ko ya ka DELED FC daka tie breaker da 4-3, hadien wada kut i por wa wei da thap ki mar chi kool. Ya ka kool ka DELED da thap da u Jomstar Pariat haka minit wa 55, katwa ya ka Ummulong SC da thap da u Tremiki Lamare haka minit wa 60.
Ha kani ka sngi pynkut da wan pynhaap pyrda ya ka lympung da u Sniawbhalang Dhar uwa man u montri ka chnat Transport, hei emlang u MLA ka Jowai, u Wailadmiki Shylla, u CEM ka JHADC u MB Rymbai, ki MDC nadooh u T. Shiwat, P. Nanglien, R. Sten, waki Waheh Chnong wa marjan ka chnong Wahiajer.
Chwa u sdang ka final da em ka yalang wa tbian wa pynlai da u Chot Pale da yoh leh i klam na u Secretary Dong Maya Club u Treky Lyngdoh, u Waheh Chnong ka Wahiajer u Kmen Shylla, wa na kiwi kiwi.
U Sniawbhalang da ong u wa ka chnong Wahiajer man ko ka chnong wa embhah tam hapoh ka Thadlaskien Block heiwa man ki dong wa em hapoh ka chnong em ki ya ki stadium iwa pynyoo wa ka yalehke sport ha Wahiajer da ku bha ko.
Da e khublei u leh ya ka Tournament Committee wa da ye ko pynlai bait ya kani ka lympung. Ka liang wa jop ha kani ka lympung da rah ko T. 1 Lak katwa kawa rem won T. 50,000.
Discussion about this post