Rah ka Wahiajer SC ya ka naam jop ha ka Open Basketball Tournament 2018

Khliehriat: Ka East Jaiñtia Hills District Basketball Association, Khliehriat da pynman ko ya ka Open Basketball Tournament 2018 hei yakrehlang wa ka Dkhiah East Basketball Team da poi ko chawa kut ynne ka sngi.

Ha kani ka lympung yalehke Basketball ka Wahiajer SC da rah ko yei naam jop deiwa pynrem ya ka East Coast BC da 49-42 Basket.

Kani ka lympung toh kawa da pynman ha Khliehriat Higher Sec. School Basketball Court.

Ha ka sngi pynkut u Haranki Syrti uwa man kam u Chairman ka VEC ka chnong Molamylliang da man u kam u kongsan wei ya ka yalang da pynlai da u Deibormi Syad President ka East Jaiñtia Hills District Basketball Association, Khliehriat.

U kongsan hei klam da e khublei u ya ka Association wa da pynman ko ya kani ka lympung deiwa kyntu ya kiwa yalehke wow man ki kiwa em akor wa i mynsien yalehke, wei wa kani ka yalehke yarap bha ko yei chait i khiah.

Da pynyaleh leh ya ka kyrdan 3^rd Place hapyrdi ka Bamon BC pyrchah ka Combined United ya kawa da jop da ka Bamon BC da 21-18 basket.