Jowai: Hadien wa ka sorkar Meghalaya ym em iwon iwon i mano ko heiyatoh wa i dawa ka seiñ lyngba ka dorkhat (Memorandum) kawa da e ha u P. Tynsong Deputy CM hadooh iwa da dep poi ka chithi ha kti u CM wow dawa u pynkrehkaam noh ya i hok ki Muster Roll kiwa kreh ha ki chnat ka sorkar Meghalaya ha Ri-loom Jaiñtia kamjooh ha waroh ka Meghalaya, iwa ka seiñ da dep yaichah ko hadooh duna soo bnai, kattae leh dang suki bait ka sorkar.
Kamtae, neiliang ka seiñ da pynkhreh ko u pynman bait ya ka chah thngan kawa khlem booh por nadooh ka 10:00 waje i step yong ka 17-12-2018 ha i thaw pynyeiñ kari hajan ka Additional Secretariat, Shillong.
Ini i dawa ka seiñ ym toh iwa eh ya ka Sorkar Meghalaya wow e næ u pynkrehkaam ya ki, watoh ini waroh toh iwa da em iwa da dep rai chwa ka sorkar Meghalaya nadooh u snem 1996, tangwa iwa sniawdiaw wa ym em bien won ki u pynkrehkaam khamtam ha ki chnat ka sorkar ha waroh ka Ri-loom Jaiñtia.
Katwa kamtæ, neiliang ka seiñ kyrpaad joor ko ya waroh ki Muster Roll kiwa kreh hapoh office hadooh kiwa cha sarok kiwa em ha kylleiñ ka Ri-loom Jaiñtia wa ha jylla Meghalaya kamjooh, yow ya mih chakhmat dei chongchit, u ya wan ya chim bynta ha kani ka yaleh yow dawa wow pynkrehkaam noh ka sorkar Meghalaya ya ini i hok yong ki Muster Roll ha waroh ka jylla Meghalaya.
Kamjooh, neiliang ka seiñ kyrpaad joor ko ya ki paidbah waroh wow sniawbha u yakrehlang wa ki Muster Roll ha kani ka kynti wa yaleh yong ki wow yoh ki ya i hok iwa toh hok hi u yoh ki, khnang wa yow nang ye chooh chooh ki u e ya i chakri deiwa bha chooh chooh neini chakhmat khamtam yow yoh u ya kmen lang waroh ha kini ki sngi kiwa kyntang yong ka Christmas wa u kmen lang ki khon ki khonruit wa u lai skur biang ki ha u snem thymme kamwa ya yoh lang ki para bru waroh.
Ini toh katkam wa pyntip u K. L. Pariat, President Jaintia PWD Muster Roll Workers & Labour Union, HQ: Jowai.
Discussion about this post