Jowai: Ka Jaiñtia Students Movement (JSM) ha kani ka 14 tarik da pynman ko ya ka lehkmen yei dap 5 snem ka seiñ ha ka yalang wa pynman ha Jalyiahkmai, East Jaiñtia Hills District.
Da wan sakhi lang ya kani ka lehkmen da u Phasmon Dkhar u MDC ka Musniang Rngad, u Dr. Phervision Nongtdu , Principal Eastern Jaiñtia College, Khliehriat kam u symbood kongsan wa u Justine Dkhar kam u Kongsan wa ki seiñbhalang kam ka AJSU, JNC wa AJHSWO wa kiwi.
Ha kani ka yalang da saam ya ki khusnaam cha ki 30 ngut ki bru wa da heh rta kawa tip kam ka Happy Old Age Award, da e leh ya ka Bravery Award cha u Hamedaioky Siangshai, ki khusnaam cha kiwa da leh bha ha ka puræ puthi nadooh SSLC, HSSLC, BA, MSc wa kiwi de ki kyrdan.
Da pynkup burom leh ya ki dkhot ka seiñ kiwa kreh chitom dooh wa kynthup ya u Chnalad Rymbai President JSM-Eastern Region wa u Skhembhalang Dkhar, Publicity Secretary JSM – Central Body kamjooh leh ya ki dkhot warim ka seiñ u Deogratias Kyndait (Founder President), u Sambormi Lyngdoh (Ex. Publicity Secretary, u Francis Dkhar (Ex. Financial Secretary) wa u Roitre Dkhar (Ex- Education Secretary).
Ha kani ka sngi da yoh leh yei puræ ya ki kaam wa da leh ka seiñ na u General Secretary u Eddie Lamare uwa da khana wa ya ka seiñ da sdang ha ka 14-12-13 ha chnong Mookhep, EJH ha ka yalang wa pynman ha Community Hall kani ka chnong.
Ha kini ki 5 snem ka seiñ da yakhih ki yow pynman da ka takit CBI ya i chah siat ki ar ngut ha Mookhep, da yarap ko wow chna ya ki kamra ka Boys Hostel ka NEIMA ha Sahsniang, da yakhih yow yoh College sorkar hapoh EJH wa kiwi kiwi de.
Discussion about this post