Jowai: Ka Khasi Students’ Union-War Jaiñtia Circle ha ka 17 tarik uni u bnai da lai ujor ko ha u Deputy Commissioner, West Jaiñtia Hills District hajrong i wan kamai be-aiñ ki truck baar jylla ha ka thaaiñ War Jaiñtia.
Ka seiñ da ujor ko ha u Deputy Commissioner wow lai sylli u ya ini da oo hi neibhah ka seiñ ha ka 26 tarik u Khonchonglad (Nov), 2018 da chem ko da ki spah tylli ki truck na baar jylla ki wym em ya ki kot ki sla kiwa biang khamtam hei wan kamai ki cha kini ki thaaiñ yong, kini ki truck da chem toh kiwa yieñ harood sarok NH-40E hadooh Land Custom Tamabil, Dawki ki wym biang ki kot ki sla kam ki Special Permit, Trading License, Labour License wa kiwi ki kot ki sla wa emkaam wow pynsakhiat wa ki wan kamai ki hapoh ka jylla Meghalaya.
Ini i leh næ khayi be-aiñ yong kini bru chim kabu da ktah bha ko ya ka yoh ka kot yong ki tre ri wei da pynroi ko leh ya i wan buhai chnong yong kiwa na baar jylla.
Ka seiñ da pyntip ko leh wa kini ki trok toh kiwa da chah beh na kiwa boon ki thaw kam na Shella, Majai Bholaganj, Dhubri Assam, Dalu Garo Hills wa kiwi kiwi ki thaw.
Neiliang u Deputy Commissioner da ong u wa daw chimkhia u wow phah noh ya ini cha u Superintendent of Police, West Jaiñtia Hills District wa cha ka yung krehkaam ka Sub Divisional Officer, Amlarem Civil Sub – Division wow leh yeiwa emkaam.
Discussion about this post