Jowai: Ka People’s Welfare and Development Society (PWDS) chirup i yakrehlang wa ka Dorbar Chnong Sohphoh da pynman ko ya ka yalang e sikai (Awareness Programme) hajrong ka phang, “I ktah i chongkha dang khynnah” namo ‘Effects of Early Child Marriage’ wa kiwi de ki sih wa ye u ktah ya ki khynnah wa ki khynroo khyllood ha ka chnong Sohphoh, West Jaiñtia Hills District kawa haap hapoh ka Thadlaskein Block kawa da pynman ha ka 18 tarik uni u bnai.
Ha kani ka sngi da wan wow chimbynta palat 100 ngut ki khynnah kiwa em ha i rta wa 14 hadooh 18 snem ki kynthai wa 14 hadooh 21 snem ki chynrang, kiwa lai skur wa kiwa ym em lai skur hei emlang ki manbei manpa wa ki waheh wa sian ka chnong.
Ya kani ka yalang da pynman ha yung dorbar yong ka chnong Sohphoh, wei da pynlai da u Kishon Kharsahnoh, waheh chnong ka Sohphoh uwa da e leh ya ki ktien pdiang burom.
Da yoh ya i klam na u President ka PWDS u Mutshwa Thabah uwa da batai pynche hajrong ka aiñ wa kyrpang wow yada ya ki khynnah kawa tip kam ka POSCO Act kawa neibynta ki khynnah kiwa chah thombor, da pynchlur u leh ya ki khynnah wa dang khai khynroo wow pynemkaam bha ya kani ka por wa kordor ha i rta yong ki. Da ong u wa i por khynroo toh iwa tbian bha wa iwa emkaam dooh ha i rukom im kam ki bru neibah man ko ka por wow saiñdur ya ka mynried ka man kawi ka yong i.
Ha kani ka sngi da yoh leh yei klam na u President ka Seng Samla Shnong Sohphoh (SSSS) u Pynshngain Kharsahnoh wa na ka Secretary ka Village Level Child Protection Committee Sohphoh ka Molibon Suting.
Ya i klam wa bniah ha kani ka sngi da yoh na ki bru chemphang wa wa na ka chnat Police Department na Jowai, kiwa da kdaw waka chongkha dang khynnah wa i chongkha khynnah man ko ka daw bah kawa pynsih wei pyn sahdien ya ka imlang sahlang, neibhah da ktah ko ya ka puræ puthi, i chait i khiah, i boon bru, i im samen u/ka khynnah, ka yung ka sem wa kiwi de.
Da pynkut ya kani ka sngi da ki ktien e khublei na u Chairman wa pynlai ya ka yalang.
Discussion about this post