Jowai: Hadooh 13 tylli ki masi wa kynthup 5 tylli ki masi chynrang, 8 tylli ki masi kynthai wa uwi u masi chynrang wa dang kha (dang ar tayaw) da chah tooh ki ha ka miet ka 29-12-18 na ka chnong Nangbah, West Jaiñtia Hills District.
Katkam ka khubor wa da yoh, kini ki masi toh ki yong ka Sngi Biam kawa chong wa sah ha ka dong Iongbiam Nangbah, West Jaiñtia Hills. Kini ki 13 tylli ki masi toh kiwa kset ha bri yong ka Sngi ha Lymbdang kawa em hajan sarok PWD na Nangbah cha Kyndongtuber.
Katkam wa pyntip kiwa ha yung ka Sngi, da ong wa yeini iwa jia da chem da u Hamret Dhar uwa man uwa chare masi uwa da chem ya ini ha ka step ka 30-12-18 heipor 8:30 i step, katwa dang mut u wow lai chare ya kini ki masi.
Manda poi u ha trep masi da chem u wa da em wa wai yei phylloh wei manda pait u da chem wa ki masi ym em de ki hapoh. Kamtæ da li thooh u ya kini ki masi cha ki thaw wa em cha jan wa cha ki loom wa jooh lai chare u ki tangwa ym em chem ya ki wei heipor janmiet da lai u cha yung yow pyntip ya ki ksu ka Sngi, kiwa da pyrchang wow li thooh dang step ha ka sngi kawa bood.
Kamtæ ha ka 31-12-18 heipor 11 waje i step uwi na ki ksu ka sngi da chemdien u wa da kit ya kini ki masi da ka truck na rood u sarok PWD. Ha kani ka jooh ka sngi da lai pyntip ki cha ki pulit ka Phramer wow yoh yarap tangwa hadooh ynne ka sngi ympu tip cheiwon em kini ki masi.
Da suba wa ya kini ki masi da kit cha ki thaaiñ khappood ka Ri Bangladesh yow challan tooh ya ki chapoh kani ka ri.
Neiliang kiwa ha yung ha sem da ong ki wa i doohnong da kynjoh i da ki lak tyngka kamtæ ki booh ki i kyrpaad ya kiwon kiwon kiwa chem namo kiwa yoo ya kini ki masi wow sñiawbha ki wow pyntip ha kini ki number mobile 9862021410, 9123395770, 9366334689, 9366562986.
Discussion about this post