Jowai: Ka seiñ Hynniewtrep Students Union (HSU) lyngba ka khubor wa phah da u President ka seiñ u K. Rymbai da pynsñiaw u yei sñiawkhia wa joor wa katwa dang mih ki sngi kattæ dang kha roi ki baar jylla hapoh ri-loom Jaiñtia kiwa wan toor wei wan kamai kajih khlem ki kot ki sla kiwa biang.
Da ong u leh wa ymye u len wa na ki por cha ki por da yoo wa ki seiñbhalang ksoh wei beh ki ya ki baar jylla kiwa wan toor cha kani ka thaaiñ tangwa sahkut ko du kamni donhi neidaw wa ki bor wa toh u pait ya kani ka kaam ym em chimkhia ki.
Da pynkynmoo u leh wa neiliang ka seiñ ka dadep ko wow e da i thoh cha ka District Council nachwa tangwa ym yoo ya ki dak ki chin hadooh katni leh. Kamtæ ka seiñ da kylli wei lada pteiñ u man kamni kiyi wow bahkhlieh ya ka jaitbru wa du chi troh donhi?
Neiliang ka seiñ da booh ko yei kyrpaad kawa joor yaka JHADC wa ka chnat yong ka kawa toh u pait ya kani ka kaam wow chimkhia wei da booh leh yei kyrpaad ya ki dorbar chnong wow paitbniah ki ya ki baar jylla kiwa wan psiah hapoh ki chnong ki thaw wei ym toh leh wow e NOC kulmar ya kiwa khlem em ki kot ki sla kiwa biang khnang wa i ym man ki kiwa tong um yong kiwon kiwon ha ri yong i chisien ka sngi.
Discussion about this post