Jowai: Ka Seiñ Khynroo Khyllood yong ka Seiñraij Mynska ynne ka sngi da pynman ko ya ka Dorbar Niamtre kawa soo yong ka ha Madan Angla-ær Neiñ, Mynska West Jaiñtia Hills.
Ya kani ka Dorbar da pynlai da u President ka seiñ, u Yoshanphrang Dhar; heiwa da yoh yei pynhær lama naka manbei ka seiñ ka Brip Sayoo, yeiwa da pynbood won da ki kyntien pdiang burom naka Budlang Dhar.
Ha kani ka sngi da yoh yei kyntien sneiñ kyntu na u Kamnipaia Challam uwa da klam hajrong ka phang “I Maya Niam Wei Jingkitkhlieh” wa na u Raphoi Iakai uwa man man kam u President ka Seiñraij Shangpung da klam hajrong ka phang “Ki Khynroo Waka Mynried”.
Neiliang ka Yoobina Sungoh na ka chnong Shangpung da klam ko hajrong ka phang “Chongkha Chongman”, u Moonlight Ktung uwa man kam u President ka Seiñ Kyntu Niamtre 12 Dolloi da klam u hajrong ka phang “Ki Khadar Dolloi waka Niamtre”, katwa neiliang u Dr. Mihshwa Tyngkan na Seiñraij Raliang da klam u hajrong ka phang “Khlem ka Niam Daw Pleh ka Dustur Riti”.
Ya ka yalang yong ka Dorbar da pynkut da ki kyntien khublei na u Wailad Lamare uwa man kam u Secretary ka seiñ wei da pynbood won da hi pynhiar ya ka lama ka seiñ da u Chanki Langbang uwa man u Dolloi ka Elaka Shangpung.
Ya kani ka Dorbar Niamtre da pynphooh da ki chaad tynre wa ha rukom wa pynkhreh da ki khon ka Seiñraij waphær waphær kam ka Myntkung, Khlookynriñ, Sohkymphor, Raliang, Mynska, wa kiwi kiwi.
Iwa rap khroo bha ha kani ka sngi ka Seiñraij Niamtre Mynska da pdiang sñiawbha ko ya kawi ka manyung na ka kur Wann kawa da uiñ biang cha kani ka niam.
Discussion about this post