Jowai: Hadien wa khut pynman khang chnong ka NESO ha kylleiñ ka thaaiñ mihsngi wow pyrchah ya i thmu ka sorkar pyrdi wow pynman aiñ ya ka Citizenship Amendment Bill, neiliang ki bor sorkar wa ki bor District da man ki kiwa da pynkhreh bha.
Katkam ka hukum na u Chief Secretary jylla, u Y. Tsering kawa poor lyngba ki Social Media da hukum ya kiwa kreh sorkar wow lai kreh bait ki wei wow phah leh ya katwon ngut wa wan kreh (Attendance) hapoh 11 waje i step ha ka 8 tarik kawa man ka sngi khang chnong ka NESO.
Heiyatoh wa ini i khang chnong neiliang u SP ka West Jaiñtia Hills u Lakador Syiem da pyntip u wa ki pulit da chimkhia bha ki wow pyntikna wow neh i chongsuk ha waroh kawi ka District.
Neiliang u Superintendent of Police ka East Khasi Hills, u Davis N R Marak da ong u wa ki pulit da pait bniah bha ki yei man i long ha ka jylla khamtam ha nongbah Shillong.
Da ong u wa ki pulit daw sonteri ki ya ki bru wa mih cha ki kaam yong ki ha ki kynta wa krehkaam kani ka khang chnong khnang wow yait na iwon iwon i jia wa ktah yei chongsuk, lait noh lada ki bru ym kwah ki wow mih dei mon yong ki hi khamtam kitu kiwa em dukan.
Discussion about this post