Shillong: Ki 14 tylli ki seiñbhalang hapoh ka lama ka Confederation of Hynniewtrep Social Organisation (CoHSO) ynne da pynsñiaw ki yei pyrchah hajrong i thmu ka sorkar National Democratic Alliance (NDA) wa yahkhmat da ka BJP wow pynman aiñ ya ka Citizenship Amendment Bill, 2016 kawa thmu wow pynman tre ri India ya kiwa na Bangladesh, Pakistan wa Afghanistan kiwa na ka niam Hindu, Sikh, Parsi, Buddhist wa Khristan.
Kini ki 14 seiñ da pynman ki yei yakhih wa jaijai hakhmat ka yung krehkaam ka Bharatiya Janata Party (BJP) Meghalaya, ha Shillong.
Ha kani ka sngi da rah ya ki kot rben wa thoh ya ki kyntien wow beiñ ya ka sorkar BJP deiwa kbai leh ki kyntien pyrchah ya ka Joint Parliamentary Committee (JPC) kawa da phah ya kani ka Bill cha Parliament khlem pynkylla ya iwon iwon wot hapyrdi i pyrchah khamtam na ka thaaiñ mihsngi.
Uwa yahkhmat ka CoHSO u Robertjune Kharjahrin da ong u wa i pyrchah man i neidaw wa kani ka aiñ booh ko hei maa ya ki khian paaid khamtam ki jaitbru ri-loom ka thaaiñ, khamtam ha Bangladesh em hadooh 1 klur duna kiwa na ka niam Hindu wei kini da booh chwa ki yei maa du nei leh ka sorkar BJP.
Ka sorkar jylla Meghalaya Democratic Alliance (MDA) ha ki bnai wa dadep da rai ko wow pynrchah ya ini i thmu ka sorkar NDA na Delhi, tangwa neiliang u Robert da pynsñiaw u yei phylla wa ka sorkar MDA katni da suki hi-eh ko hadien wa da pynbna da u Montri Rangbahdooh ka ri, u Narendra Modi ha Assam wow pynkrehkaam bait ya kani ka aiñ neibhah ym em pyndam ko ya ki MLA ka BJP na ka sorkar wei da pynbaad u wa ini pynyoo Myntri Rangbah ka jylla, u Conrad K Sangma da che wa yachah ya waroh ar liang.
Da ong u wa ki seiñ saiñpyrthai ri-loom toh u dawa ki wow pyndam ya ka BJP na kani ka sorkar MDA. Da pynrap u leh wa ki dkhot ka BJP hapoh jylla toh u dam noh ki u man dkhot kani ka party.
U Robert da ong u leh lada ki dkhot ka BJP Meghalaya dang maya ki ya ka jaitbru toh u pynbor ki ya ka sorkar NDA ha Delhi wow pyndam noh ya kani ka Bill wei lada ymye ki wow leh kamtæ wow dam noh ki u man dkhot kani ka party, wei lada ki dkhot ka BJP kyrchaan ki ya kani ka Bill pynyoo toh kiwa chet kylla ya ka jaitbru.
Da pyntip u leh wa ka CoHSO kyrchaan pura ko yei yakhih ka NESO kawa khut pynman da i khang chnong ha ka 8 tarik ha waroh ka thaaiñ mihsngi.
Discussion about this post