Shillong: U MLA samen ka Nongkrem Constituency uwa man leh u Chairman ka Meghalaya State Planning Board (MSB), u Lambor Malngiang ynne ka sngi da pynsñiaw u yei pyrchah ya ka sorkar NDA wa yahkhmat da ka BJP ha Delhi wa mynjur ya ka Citizenship Amendment Bill ha ka dorbar Lok Sabha.
Da ong u wa daw thoh u cha u Montri Rangbah, u Conrad K Sangma wow dawa khut ya ka dorbar kyrpang neibynta wow pyrchah pynman aiñ ya ka Citizenship Amendment Bill wa da mynjur da ka dorbar Lok Sabha.
Hawa yaklam wa kiwa pathai khubor, u Lambor da ong u wa ka sorkar jylla toh u chim ko ka rai wow pyrchah ya ka CAB deiwa chim ya ka rai (Resolution) ha ka dorbar da waroh ki MLA ka jylla wow pynsñiaw cha ka sorkar India wa ki MLA ha ka jylla yatylli ki neibynta i emkaam ki paidbah ka jylla.
Kam uwa mihkhmat paidbah yieñ u ha ka sur yong ki paidbah kiwa na ki ri-loon neibhah kani ka Bill man ko pyrchah ya ki paidbah ki jylla wa ka thaaiñ mihsngi.
Da ong u wa i yoh wow man tre ri kiwa na baar joor bha ko wot hawa ympu pynkrehkaam ya kani ka Bill, da pynrap u wa kamwa man ha Assam aw marchiteiñ na kiwa chong chnong toh ki bru wa na baar wei wot ha ka jylla Meghalaya da yoo ya kam ini i sdang roi kiwa na baar.
Heiyatoh wa i dawa ki seiñbhalang wow pyndam noh i yakreh wa ka BJP ha ka sorkar jylla, neiliang u Lambor da ong u, kamwa man kattæ ympu yoobiang wow pyndam ya ki MLA ka BJP neibhah ki leh da chim ki ka rai wow pyrchah ya kani ka Bill.
Discussion about this post