Jowai: Katkam wa pyntip ki pulit da leh ki da ka Suo-Moto Case ha ka 11 tarik pyrchah ya kiwa yahkhmat wa ki dkhot ki seiñbhalang wa kynthup ya ka HYNF, RBYF waka FKJGP kiwa pynman ya ka yalang ha Khyndailad, Police bazaar, Shillong yow pyrchah ya iwa mynjur ya ka Citizenship (Amendment) Bill 2016 ha Parliament, khlem yoh bor na u District Magistrate, East Khasi Hills.
Ki pulit da ong ki leh wa kani ka yalang da pynman ha ka thaw wa khynnai wa boon bru wei da pynwit ya i lai i wan ki kari. Wei kiwa yahkhmat da klam ki ya ki kyntien wow pynsniaw yapher jaitbru kamjooh ka niam.
Ki pulit leh da leh ki ya ka Suo-Moto Case pyrchah ya ka seiñ Confederation of Hynniewtrep Social Organisation (CoHSO) kawa haka 10 tarik uni u bnai da pynman ki ya ka ‘Road blockade’ nadooh 7:00 waje i miet hadooh 5 waje i step ha waroh kawi ka jylla kawa man pyrchah ya ka hukum wa pynmih ka High Court of Meghalaya wow khang ya i pynbna ya ki kaam chang chnong wa ktah ya i im i lai i wan ki paidbah.
Da leh leh ya ka Suo-Moto Case pyrchah ya ka North East Students Organization NESO wa kyrchaan da ka KSU wow khut ya ka khang chnong ha ka 8 tarik uni u bnai ha waroh ka thaaiñ North East deiwa saam ya ki kot lakdop ha Shillong yow pyrchah ya ka Citizenship Amendment Bill 2016.
Discussion about this post