Jowai: Ka Seng Samla Katholik Balang Jowai (SSKBJ) ynnin da pynhaap pyrda ko ya i lehkmen dap 40 snem næ Ruby Jubilee kawa da seiñ nadooh u snem 1979.
Ha kani ka sngi da pynman ya ki prokram waphær waphær nadooh i por 10 waje lyngba ka Mass wa khooid ha yungmane ka Balang Katholik Jowai hajrong ka phang “Shine Your Light on the World”.
Kani ka sngi pynkut da man ko leh ka sngi pyndooh noh yaka Seng Samla Katholik Balang Jowai deiwa thung næ pynkup bor noh da kawi ka wow tip kam ka Seng Samla Catholic Managing Committee kawa haap hapoh i pait ka Parish Jowai wei ya kani ka Committee da bhah haki 5 bynta wa kynthup yaka Tpep Pale Chilliangraij, Khimusniang Iawmusiang, Newhill Ladthadlaboh Caroline, Dongmihsngi Moosalyngkat wa Mookyrdup Tyndowapung.
Da ong leh wa ka rukom krehkaam kini ki Catholic Managing Committee (CMC) u ryngkat bor wa kiwi tawon ki balang haki chnong nongkyndong.
Haka kynta yong ka Mass wa khooid nalor wa pynkupbor yaki CMC da saam leh cha ki ya ki tiar krehkaam waphær waphær yong ki, katwa u Parish Priest Fr. H. Lamare hawa e yei klam da booh u yei kyntu ya ki CMC wow kreh hok ya iwa da pynkit ha ki.
Ha i por nohchariñ ka sngi won da em ka lehkmen kawa pynmman ha pchem ka skur Marian Hill heiwa da em ki rwai, ki chaad, ki lehke droma wa tbian wa chim bynta da ki dkhot ka Seng Samla waphær waphær wei da em leh i ah ya u Cake dap 40 snem da u kongsan u F.B. Basan BDO ka Laskeiñ Block ha i sakhi lang ki phadar ki sister wa ki para wa ngait ka balang.
U F.B. Basan hawa klam da ong u wa kam ki Seng Samla toh u man ki kiwa khlan hei ngait wei wow tip ya ka ktien u Blai wei wow kylli leh pyn da ki ya ki hi kamon wow wanrah ya i che, u em leh ka yatylli ha ka yurim wa kynthup ya i sikai wa bha ha yung ha sem, ha imlang sahlang wa haka Balang.
Discussion about this post