Da wai paidbah yow motdur wa T. 18 Lak yong u woh Kiang Nangbah

Khliehriat : Ha pachem ka BSF wa em ha Khliehriat, East Jaiñtia Hills ynne ka 29 tarik da wai paidbah ya u mot dur u Kiang Nangbah wa chongdor T. 12 Lak.

Ya ini i wai ya u mot dur u Kiang Nangbah u wa jrong 15 ft nadooh na tre hadooh i khmut ka wait da chna da u Dilip Bhusan Sarmah u bru chemphang heini i kaam (Artist) uwa na sorbah Guwahati deiwa pynwandur ya u Kiang Nangbah na i tama (bronze) weiwa chimpor 4 bnai u chna ya uni u mot dur.

Hei yalam wa uni u Dilip ong u wa da chna u ya uni u mot dur heidor wa duna weiwa ym em yoh nong u neini kreh neibhah katkam i heh yong uni u mot dur jooh chongdor hadooh T. 20 Lak u chna. Da ong chooh chooh u leh wa da chna kyrpang bha ya uni u motdur wei wym sih ym sarang u.

Related posts

Daw pynman ya ka General Meeting wa nyngkong ka Kur Sumer Pyllun ha Amlarem

November 23, 2024

Dei kreh yonglang pynkhreh ka Seiñ Raij Raliang ya ka Kopati Puja

November 17, 2024

Hachwa u wai ya uni u motdur u Kiang Nangbah da em ka yalang paidbah wa heh wa pyllai da u M.H. Dkhar uwa man leh u President ka seiñ All Jaiñtia Youth Welfare Organisation Central Body kawa man leh ka seiñ wa da kreh yow pynmih poisa yow chna ya uni u mot.

Ya ka poisa wa T. 18 Lak da e da ka Jaintia Hills Cement Manufacturers’ Association ka seiñ ki kharkhana pynmih khyndawbilat wa em hapooh ri-loom Jaiñtia. Da ong ki leh wa daw e sa chi lak tyngka neidaw wa boon i lut hadooh wow wai ya uni u mot dur.

U ma R. Syngkon, MLA hei klam yong oo da pynkynmoo u ya ki paidbah wa toh u man ki kiwa ya tylli wei kamjooh leh u leh ki yei bynta yong ki deini ye i u kynjoh palat yeiwa u Kiang Nangbah da ye u.

U S. Mukhim, MLA da khana u yei parom wa nieyi i daw wa yieñ pyrchah u Kiang Nangbah ya ki pharæng wei wa kammon da jied ya u Kiang Nangbah kam u wow yahkhmat pyrchah ya ki pharæng.

U J. Dkhar, MLA hei klam yong oo da pynkynmoo u ya ki paidbah ya uwa chet kylla ya u Kiang Nangbah wiewa hadien wa dep pasi ya u Kiang Nangbah ka yaleh pyrchah ya ki phareng dang pteiñ i hei yahkmat ki Dolloi cha ki thaiñ Sutnga wa cha thaiñ War tangwa ha waroh ini ki wa yahkhmat da chah chet kylla ki pyn ha ki bru yong ki hi.

Ha ka yalang paidbah da em ki MDC ka JHADC, ki Dolloi, ki Waheh Chnong, ki MLA u DC ka East Jaiñtia Hills wa kiwi kiwi.

Da yoh leh ya ki rwai ki chaad yong ki skur ka thaiñ East Jaiñtia Hills wa kiwa rwai wa ki wa chaad tynre na Jowai.