Jowai: Ki paidbah ki 34 tylli ki chnong wa em ha ka thaaiñ Lumshnong, Umkiang, Byndihati da pynsñiaw ki yei chrai hadien wa nyngkong da pynbna wa daw pyndooh bordiñ nadooh ka 18 tarik hadooh ka 21 tarik uni u bnai yow chna pynbha ya u Transformer wa em ha Lumshnong Sub Station tangwa hadooh ynne ka sngi leh ym pu em yoh bordiñ ki.
Ki paidbah da pynsñiaw ki yei sñiawsih ya ini i chah thok ki ha ka MePDCL iwa da ktah chiboon ya ki khynnah wa dang pynkhreh ya ki Exam waphær waphær wei ha kini ki sngi da lai mih ki paidbah cha ka Sub Station wa em ha Lumshnong wei da yoh bordiñ kattu katni kynta tangwa hadooh ynne ka sngi dang dooh bordiñ.
Ki paidbah ka Sonapyrdi kiwa da pynkhreh ya ka Lukha Festival da khuslai ki wa lada kamni daw sepai waroh iwa da dohyap ki neidaw wa heipor miet em boon ki prokram wa da pynkhreh ki.
Da em leh kiwa da ujor cha u montri rangbah lyngba u WhatsApp Public Grievance tangwa ym em yoh jubab ki.
Kam wow pynkynmoo kiwa da chah ktah na ini i pyndooh bordiñ man ki kamni ha wah:
- Lumshnong-Umkiang Area:
Lumshnong, Brichyrnot, Umstain, Umsatad, Khatdum, Tongseng, Lumtongseng, Umtalen, Sonapur, Lummyrli, Shymplong, Kuliang, Borsara, Pyrtakuna, Umkiang Apha, Umkiang, Lamasooski, Donabhoi, Donaskur, Donaumbluh, Wahkoh, Pahar-umkiang, Ratacherra wa Malidor.
- Lumshnong-Byndihati Area:
Ki bynta ka Byndihati, Umtyra, Nongsning, Umrasong, Mynkre, Chiehruphi, Wahiajer, Thangskai, Musiang Lamare New, Musiang Lamare Old wa Umrasiang.
Discussion about this post