Shillong: Ka chnat Election ka jylla ynne ka sngi da pynman ko ya ka pynche paidbah hajrong i rukom krehkaam ki kor thap Vote ya kiwa tip leh kam ki Electronic Voting Machines (EVM) wa emlang ki Voter Verifiable Paper Audit Trail (VVPAT).
Ha kani ka pynche paidbah da pynman ya ka ha Shillong Club, heiwa da wan chimbynta da ki seiñ saiñ hima wa kynthup ya ka UDP, Congress wa kiwi kiwi.
Hawa e yei klam, neiliang u Chief Electoral Officer (CEO) ka jylla u FR Kharkongor da ong u wa kini ki kor EVM toh kiwa chngaaiñ wei chaniah ya ki neibhah wa da chna ya ki ha ka rukom wow khang yei leh thok ha ki.
Da pynrap u leh deiwa ong wa ye wow thut i krehkaam ki kamwa man ki mobile phone tangwa ymye wow leh thok leh rieh ya ki deiwa pynrap deiwa ong wa kini ki EVM da pynskem ki yei sñiaw kiwa thap vote deiwa pynemkaam ya ki Voter Verifiable Paper Audit Trail (VVPAT) kawa ye u pynsakhiat yeiyi wa da jied.
Da ong u leh wa hadooh wa da dep pynemkaam hadooh ki le tylli ki Election MP ha ka ri da ki EVM wei boon ki MLA ha ki jylla waphær waphær i thut ki EVM ha ka ri waroh kawi katkam ka yukheiñ ka Election Commission da man ko du 5 percent katwa ha Meghalaya da man ko kawa rap duna bha.
Discussion about this post