Jowai: Ha ka 2 tarik da pynkut ya ka Don Bosco Super Cup Knockout Football Tournament ha ka chnong Madankynsaw, Mowkyndeng heiwa da yachem Final ka Sahsniang-A FC pyrchah yaka Priang FC.
Ka yalehke man ko kawa yoosuk hadooh kattæ kattæ heiwa hadooh wa kut ka Extra Time leh ym em wa yoh u thap kool kamtæ da pynman da ka yachut Tie-breaker heiwa ka Sahsniang-A FC da man ko kam kawa jop.
Da em 32 tyilli ki Club kiwa da wan chimbynta na kylleiñ ka ri-loom Jaiñtia kiwa wan ha kani ka Super Cup heiwa kiwa jop ya ka Final da yoh ki ya ka song poisa wa T. 50,000 katwa kiwa rem da yoh ki T. 30,000 deilang wa ki Trophy.
Ya kani ka Super Cup daw pynman ya ka man u snem da ka Dorbar Chnong Madankynsaw-Mowkyndeng kam wow bood ya ka thong kani ka lympung wow chlur wei yaineh ka wow yarap yaki khynnah khynroo khamtam ha ka liang ka Football.
Ha kani ka sngi da wai paidbah leh yaka Podium yong ka madan Umrajha kawa chna da ka Scheme NREGA.
Da emlang ha kani ka sngi u Danny Shadap, waheh chnong yong ka chnong Madankynsaw- Mowkyndeng, u Moses Swer JE yong ka Laskein C&RD Block, u Peter Ram Sutnga u President yong ka MUSCC, u Robert Chympa Secretary yong ka chnong wa kiwi tawon kiwa heh wa sian na kylleiñ ki chnong.
Discussion about this post