Ha Delhi lai yachem ka NESO ya ki MP wow pyrchah ya ka CAB

Jowai: Ka North East Students’ Organisation (NESO) kawa man ka satri ki seiñ ki khynnah puræ ki jylla ka thaaiñ mihsngi wa kynthup ya ka KSU, AASU, GSU, AMSU, TSF, AAPSU, MZP wa ka TSF, kiwa da yaleh pyrchah ya ka Citizenship (Amendment) Bill 2016, da yachem ki wa u Vice President ka JDU, u Prashant Kishor ha New Delhi ha ka 3 tarik hajrong ka CAB 2016, heiwa u Vice President ka JDU uwa da kular wa ka JDU u Vote lang ko waroh pyrchah ya ka CAB lada wanrah ya ka hapoh ka Rajya Sabha.

Ki dkhot ka NESO da yachem ki leh ya u MP ka BJD, u Bhartruhari Mathab, uwa da kular leh wa ka BJD leh pyrchah ko ya kani ka Bill wei daw Vote ko pyrchah ya ka CAB hapoh ka Rajya Sabha.

Ha kani ka sngi ka NESO da yoh ko leh wow yachem wa u Conrad Sangma, u montri rangbah ka jylla uwa deilang wa kiwi ki seiñ saiñ pyrthai ka thaaiñ mihsngi wa kynthup ya ka AGP, NPF waka INPT da lai pysñiaw ki yei pyrchah yong ki ya ka CAB cha ka sorkar pyrdi.

Ka NESO daw yachem ko leh wa u Sanjay Raut, MP ka Shiv Sena wa kiwi kiwi de.