Jowai: Ka Khasi Students Union Laskein Circle ynne ka sngi da lai yachem ko ya ka Branch Manager (BM) ka State Bank of India, Raliang Branch hajrong i ujor wa da yoh naki paidbah wa kani ka chnat ka paan ko ya u Aadhaar Number naki paidbah kiwa mut wow wai Account ha kani ka Bank.
Hadien wa da yoh ujor, neiliang ka KSU Laskein Circle hapoh i yahkhmat Balawan Suchiang President, wa u Peter Ram Sutnga, General Secretary ka seiñ da lai pynche ki ya kani ka Branch Manager kani ka chnat.
Hawa yaklam wa kani ka pait ya kani ka Bank, ki dkhot ka seiñ da pysñiaw ki yei sñiawkhia lada paan Aadhaar Number neibhah man ko pyrchah yaka hukum yong ka Supreme Court. Neiliang yong ka Branch Manager da ong ko wa neiliang ka Bank ym em e bor ko ya kiwa kreh wow paan Aadhaar Number, wei ini waroh da mih i toh wa leh stad wei leh thurmur yong kiwa kreh.
Heiyatoh wa ini neiliang ka seiñ da kyntu ko ya ki paidbah wa ymtoh u e Aadhaar Number cha ki Bank wei lada ki Bank ki dang pteiñ ki wow paan neiliang ka seiñ ym banse ki wow lai chakhmat.
Discussion about this post