Ha ka MHRC lai ujor ka HYC wa u MLA wa chah thombor ki Khasi ha Langpih

Shillong: Ka Hynniewtrep Youth’s Council (HYC) da lai ujor ko cha ka Meghalaya Human Rights Commission (MHRC) pyrchah ya ki pulit Assam kiwa da thombor ya ki Khasi ynnin ka sngi ha ka chnong Umwali, Langpih West Khasi Hills District.

Hawa yaklam wa ki laad pathai khubor, u President ka HYC, u Robertjune Kharjahrin da ong u wa i lai ujor ka seiñ ha ka MHRC man ko wow pynshem wei wow pynsakhiat yei mantre ka thaaiñ khappood wa ka Assam wa kynthup ya ki chnong ha Langpih.

Da ong u wa i thombor ya ki Khasi toh da jia i ha i thaw yong ki Khasi hi, ha West Khasi Hills wei ki pulit Assam toh u jubab ki leh ha khmat ka Commission ha Meghalaya.

U Kharjahrin da pyntip u leh wa neiliang ka seiñ ka da dawa ko wa ka MHRC toh u thung ko ya ka takit yow pynchitom ya kiwa emkti katkam ka aiñ, wei wow pynngat ha ki aiñ ya ki pulit Assam wa dat dusmon ya ki Khasi, wei ka sorkar jylla Meghalaya u phah ko ya ki pulit ka jylla cha Langpih wow yada ya kiwa chong chnong ha khappood. Chooh chooh da ong u wa ka seiñ ka dawa ko leh wa ka sorkar Assam hap su ko ya ka bai lutsan cha kitu waroh kiwa mynsoo wei da dawa leh wow pynlait syndon ya ki ar ngut kiwa ki pulit Assam kem ki, wa kynthup ya uwa yahkari ya ka MeECL wa uwi u Secretary chnong yong ka shnong Umwali.   

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Wa pynchit uwi u Kharkhali, ong u MLA

Ha kani ka sngi, neiliang u MLA ka Rambrai-Jyrngam, u Kimfa Sidney Marbaniang leh da lai booh u ya ka ujor hakhmat ka MHRC wow chimkhia ki yei leh embor ki pulit Assam du nei pynchit ki kattu katni ki Kharkhali.

U Kimfa uwa da lai cha kani ka thaw wa jia ynnin ka sngi da pyntip u wa ki pulit Assam da leh ki ya ini neidaw wa pynchit yong uwi u Kharkhali hadooh wa oo leh kam u MLA da pynsñiaw u yei sñiaw chrai ya u tai u bru.

Ha i jooh i por u MLA da pyntip u wa ya kani ka jooh ka ujor daw rah hakhmat ka Meghalaya State Commission of Women (MSCW), cha u Montri Rangbah, u Montri kaam pohyung, cha u Lamphang ka yung dorbar wa cha u Chief Secretary ka jylla.

Hajrong i pynbaad ki pulit Assam wa da em ka kawang moo neiliang ki paidbah Khasi, neiliang u MLA da kyntait u deiwa ong wa toh du i e daw donhi.