Shillong: Hadien 21 snem wa wiar ka pansngiat Miss Meghalaya, ya kani ka yakob miat kynthai Miss Meghalaya da pynman biang ya ka da ka Meghalaya Tourism Youth Development Society (MTYDS) kawa da lai cha ka Tanvi Raksam Marak (20) napyrdi ki 23 ngut ki khyllood ka jylla.
Ya kani ka ya Miss Meghalaya da pynman lang da ka Meghalaya Tourism Youth Development Society (MTYDS) deiwa ksohkti lang waka ‘Glam and Supermodel India’ ha ka 16 tarik uni u bnai ha Bakur, Dawki.
Ka Tanvi Raksam Marak kawa yoh yei naam jop da yoh ko leh ya ka songpoisa wa T. 1 lak, wa ar da yoh ka Sanwaka Surong katwa hei wa le won da yoh ka Nazareen Kharubon.
Kawa jop u da man ko kam ka Glam and Supermodel India wei u lai chimbynta ko haka ‘Miss India Earth, 2019’ waka ‘Miss India International, 2019’ kawa daw man ha Mumbai wa Delhi katwa kawa yoh wa le daw chibynta ko haka Miss Teen India 2019.
Ya kani ka yakob Miss Meghalaya 2019 da wan bichaar da ki 6 ngut kiwa kynthup ya ka Miss India Earth, 2018, ka Deepika Vaid wa u Amjad Khan Pathan uwa man u Director ka Glama and Supermodel India.
Naeiliang u Daniel Khongsit uwa man u Waheh Chong ka Bakur wei kamjooh uwi na kiwa yahkhmat ka MTYDS da e khublei u ya waroh kiwa wan chimbynta khamtam ya ki hajar ngut ki paidbah kiwa da e ya i kyrchaan wow sakhi yow pynman ya kani ka yakob kawa jop.
Ha kani ka sngi u Montri ka sorkar jylla, u Lahkmen Rymbui da man u kam u kongsan wei da pynbna u leh ya ka yarap poisa T.5 lak yow pynman biang ya kani ka yakob ha u snem wow wan.
Discussion about this post