Jowai: Ynne ka sngi ka yung bichaar wa khlieh dooh ka ri, ka Supreme Court da chong bichaar biang ko ya ka mukotduma hajrong i tih ya u mooyong hapoh jylla ya kawa da ujor da u Lber Laloo wa kiwi kiwi.
Katkam ka yutip wa dang yoh na kani ka bichaar hajrong i yoh wow tih biang ya uni u mar, ka SC da hukum ko ya ka sorkar wow pynbiang ya ki kot ki sla hapoh 6 tayaw khang wow ye u pynlait biang ya i tih ya uni u mar.
Ya kani ka rai da e hadien wa da yoh ya ka chithi na ka Ministry of Coal ka sorkar India kawa ong wa ya ka jylla Meghalaya hun hi ki wow pynlait na ka aiñ Coal Mine Nationalisation Act wei da yooluti wa ka sorkar India u chim ko ya ka rai wa khaddooh hapoh 30 sngi katkam wa pyntip u muktiar ka sorkar jylla.
Hajrong i wow kit ya u mooyong uwa dadep tih uwa dang sah katkam ka mukotduma ki bru samen wa kyrpaad wow kit noh ya oo, ka SC da kylli ko na ka sorkar wa sa katwon em u mooyong uwa dang sah.
Hajrong ini ka sorkar ymem ye ko wow jubab, katwa kamtæ da hukum ya ka sorkar wow e yukheiñ biang hapoh 4 tayaw chwa wow ye u hukum pynlait biang wow kit ya u mooyong wa dadep tih.
Da pyntip leh cha ka yung bichaar wa ka sorkar jylla da dep chna ko ya ka Committee wow leh ya ini.
Neiliang u Wyrta daw pyntip chooh i chaphi hajrong kani ka bichaar wa pura.
Discussion about this post