Shillong: U MDC ka Mawsynram Constituency uwa man leh u kyrtong MDC ka NPP na Mawkhar-Pynthor, u Pynshngain N Syiem da ong u wa ka Election MDC man ko kawa emkaam bha neibhah em chiboon tylli ki phang wa ka Council toh u leh ko kam ka laad wow yada.
Hawa klam u ynne ka sngi, u CEM warim ka KHADC da ong u wa kani ka Election ha kani ka kynti u man ko kawa chongchit bha neibhah lada wyrchaw wa ki por wa da dep, kani ka Election MDC katni em ko boon tylli ki phang, lada yatoh wa u pood u ang hapyrdi ka Meghalaya-Assam, i chem chitom ki Rangbah Shnong, ka aiñ chna yung ka MUDA, ka rukom mantre ya ka khyndaw u chyiap waka Village Administration Bill kamjooh kiwi kiwi ki phang.
Da ong u waka District Council da chna ko boon ki bynta wow chna ya ki aiñ wow yada ya i mantre, hanlada em kiwa da ong wa ya ka District Council toh u pyndooh noh. Da ong u wa i emkaam yong ka District Council da che bha ha u snem 2014 hadien wa ka Meghalaya High Court da rai ko wow pyndooh bor ya ki Rangbah Shnong, heiwa waroh da kyruiñ ki cha ka Council wow yada ya ki.
Da ong u leh wa ka kaam wa u pood u ang waka jylla Assam leh man ko kawa emkaam wow pynbait lyngba ka District Council neibhah ka Council kawa ye u lum u lang ta ki kot ki sla wow pynsakhiat ya u pood u ang. Da ong chooh chooh u wa emkaam wow rah ya ini hakhmat ka Supreme Court yow pynsakhiat yei mantre ya ki thaw wa em ha khappood.
Da ong u wa ha kani ka Election emkaam ya ki bru rangbah ki wow man kam ka stieh wow yada ya i mantre.
Discussion about this post