Jowai: Katkam wa pyntip ki pulit ha ka 24 tarik uni u bnai da chem ya iwi i metyap uwi u bru wa ym tipmit na Lawkynthei kawa em ha ka chnong Rashan, WKH.
Ha ka 19 tarik uni u bnai u ka Pried Nongrum da ujor ko wa heipor 5:30 i janmiet da em ki bru wa ym tipmit kiwa da noh ya i metyap khonboo hajan ka paikhana ko wa em ha Madanrting, Lumjingsuk, Block- A, Shillong.
Ha ka jooh ka sngi ka Chrishbina T Sangma da ujor ko wa ka khon yong ka da wiar ko wei ha ka sngi wa bood ka 20 tarik da chem ya ka na iwi i khloo wa em ha chnong Danakgre, WGH. Hadien da chem wa da chah rah bor ko ko ha u Bambam Marak uwa naka chnong Waribok.
Ha ka 20 tarik won u Victor Marak naka chnong Tikrikilla, WGH da ujor u wa da yoh yutip u na u nokma ka chnong Raksamgre wa le ngut ki bru u Fareed Khan, Md. Sheer Khan wa u Md. Shadab Khan da chah kdoh ki ha ki paidbah wa da leh khlem akor ki ya ka wi ka kynthai ha kani ka chnong.
Hadien wa wan pyllait ki pulit ya ki da kit ya ki cha PHC Tikrikilla, wei hadien da kit ya ki cha CH Tura. Ha ini i jia u Mridul Hussain uwa yah kari da yoh u yut na ki paidbah wei da booh ya oo wa ki pulit yow lait u na i chah pynmynsoo.
Ha ka 23 trik won heipor 3:40 i step synyaw u Rupchan Ali (32 snem), u Mamud B Marak (33 snem) wa u Sahib Ali (34 snem) da tooh ki 39 tylli ki Batteries naka Mobile Tower wa em ha chnong Wahlyngkhat, EKH. Wei ki pulit da kem ki ya kini kiwa emkti.
Ha ka 21 tarik u Salim Uddin Laskar da ujor u wa ha kani ka miet da em wa tooh 24 tylli ki Batteries wa chong dor T. 1,50,000 na Jio Mobile Tower wa em ha Lumshnong, EJH.
Ha ka 23 tarik da em kiwa lute ya i yung ka Patricia Kurkalang wa em ha Rngi Shyllong, Shillong wei da tooh ki T. 15,000, ka wi ka mobile phone ki sula wa ki tiar yung.
Ha ka 22 tarik won heipor 6:45 i miet da em 10 ngut ki bru wa da tymmoh yei khmat da lute ki ya i yung ka Lesita A Koch iwa em ha chnong Tangbari, SWGH wei da tooh ki T. 3,500 wa ki deiñ ksiar.
Discussion about this post