Jowai: Ynne ka sngi em kattu katni tylli ki kotkhubor na Shillong da pynmih khubor ki wa em 4 ngut ki bru Pnar wa chah pyniap ha kti ki Karbi People’s Liberation Tiger (KPLT) ha Pangam Raliang (Block 1). Ia kani ka khubor da phah da u Ohibait Dkhar u President ka KSU Jaiñtia Hills District Unit. Ha kani ka khubor bakla da ong wa uwi naki wa iap toh u nongsikai. Ka khubor da ong ko leh wa kini ki 4 ngut da chah pyniap ki hadien wa ym em su ki ia ka poisa wa 1000 tyngka chi yung wa da paan da ka KPLT.
Neiliang u DC iong ka West Jaintia Hills District u Arunkumar Kembhavi ong u wa waroh kini ki khubor wa thoh chah pyniap ki 4 ngut toh iwa thok. Ong u wa ka District Administration iong ka Karbi Anglong, ki tnat police iong ka Hamren District wa u Commissioner & Secretary ka sorkar Assam leh ong ki wa ym em kiwa chah pyniap.
U DC won da ong u wa ha ka 7 tarik uni u bnai da chem ia kawi ka metiap iong u wi u bru wa pyrtuit u Babu Hamkar da ki 5 ngut ki bru Pnar. Da suba ki nong Karbi wa toh chah pyniap u ha kti ki bru Pnar. Hadien ini da su tput kylla wei da chah pyniap uwi u bru wa pyrtuit u Laborious Nongrum ha kti iong ki bru Karbi wymtip pyrtuit ha ka 14 tarik uni u bnai. Ia kani da pyntip u DC cha ki police iong ka Hamren kiwa da lai li tih biang ki ia ka metiap iong uni u bru iow leh Post Mortem.
Da e jingtip u DC wa ha kani ka 26 tarik uni u bnai arngut ki bru wa tip pyrtuit kam u Wom Shadap u wa man kam u secretary iong ka chnong Shilliang-Mynriang wa u Lakhon Suchiang da chah kem ki ha ki paidbah iong ki bru Pnar deilang wa ki bru Karbi neidaw wa kini ki arngut khrong poisa yabor ki na ki paidbah. U OC iong ka Hamren da ioh u ia 2 tylli ki suloi SSBL na kini ki arngut. Ia kini ki arngut da kem ia ki wei hadooh kattae dang em ki ha thanat. Dang em sa 10 ngut ki bru wa khrong poisa na ki paidbah, wa hadooh katni ym pu em ioh kem ia ki. Na kini ki 10 ngut toh u Tim Lyngdoh u nong chna suloi.
Chooh chooh u DC da ong u wa ha u bnai wa dep ki KPLT da sdang pan ki 1000 tyngka chi yung na ki chnong wa em ha khappood. U DC da chimkhia u ia kini ki kaam pyntien bru iong ka KPLT wei da dep iaklam u wa u SP ka Hamren hei iatoh wa ini.
Neidaw wa jia ini 15 ngut ki bru da yut ki na Moojem cha Moolber, chi 132 ngut na Mukhim da li thooh thaw rieh ki ha ka chnong Mooluber nadooh ka 28 tarik uni u bnai. 17 ngut wan da wan ki na Myrngi cha Jowai wei da sah ki chi miet. U SP ka West Jaintia Hills ha ka sngi wa bood da ye u pynbor ia kini ki 17 ngut u liwan ki cha chnong ki kamjooh leh da e iada ia ki hadooh Khanduli neitae wan ki pulit ka Assam da li booh ki ia ki hadooh cha chong ki.
Ong u DC wa em kattu katni ki wa kwah u pymih sih wa i sniawthuh bakla ha pyrdi ki bru Pnar wa ki bru Karbi. Ong u leh wa ka khubor wa mih ynne ka sngi da thoh ki wa ki bor district iong ka West Jaintia Hills District da kular ki u e thaw rieh thaw dem ia ki bru wa yutchnong ha chnong Psiar, toh iwa bakla suda.
Da pynkut u DC dei wa maham joor ia waroh ki sein ne kiwon kiwon kiwa pynmih khubor thok kiwa ye u pynthut ia i imlang sahklang ki bru iong ka district. Lada chem, ia kini daw pynchitom kat kam ka ain.
Discussion about this post