Shillong: Ka Bharatiya Janata Party (BJP) kawa kyrchaan ya ka sorkar wa yahkhmat da ka National People’s Party (NPP) ka Meghalaya Democratic Alliance (MDA) da rai ko wow pynyeiñ kyrtong ha kani ka Election MP na Shillong wa Tura.
Ya kani ka rai da chim hadien ka yalang wa chong knor da u BJP General Secretary wa pait ya ka North East u Ajay Jamuwal uwa da emlang ynne ka sngi.
Hadien ka yalang u AL Hek da pyntip u wa daw yakhun Election ka BJP na Shillong wa Tura.
U Hek da pyntip u leh waka Election Committee ym slem de daw khut ko ya kiwa kwah wow yaleh MP wei daw yachem wa u National President u Amit Shah yow pyntip ya oo ya kani ka rai.
Da ong u Hek leh wa da em chwa 4-5 ngut kiwa da wan cha kahmat wow paan Ticket yaleh MP tangwa da kyntait u wow pyntip lada u State President u Shibun Lyngdoh man u uwi na ki wow yeiñ na Shillong.
U Hek da ong u leh waka Meghalaya Democratic Alliance ym em chim ko ya ka rai wow pynyeiñ ya u kyrtong hunlang wei ka United Democratic Party (UDP) waka Hill State People’s Democratic Party (HSPDP) da rai ki wow pynyeiñ ya jar jiar u kyrtong.
Da ong u leh wa ka BJP em ko du ar ngut ki MP ha u 1984 tangwa katni man ko ka Party wa heh dooh ha ka ri deiwa jubab yei tlot ka BJP haka Election MLA hapoh ka jylla.
U BJP State President u Shibun Lyngdoh da ong u wa nyngkong da pyrkhat wow kyrchaan yei rai ka MDA wow pynyeiñ ya u kyrtong hunlang tangwa neidaw wa ym em jia iyi iyi leh da chim ya ka rai wa ym yang de.
Discussion about this post