Jowai: Ka yung krehkaam ka District Social Welfare Officer West Jaiñtia Hills District, Jowai da wai ko ya ka “One Stop Center” kawa em ha Tpep-Pale Jowai ha ka 4 tarik uni u bnai kawa kyrchaan poisa na ka Ministry of Women and Child Development of India.
Ya kani ka One Stop Center da wan wai da u Garod L.N.S Dykes, IAS, Deputy Commissioner, West Jaiñtia Hills District, Jowai uwa man leh kam u kongsan ha kani ka sngi. Ha chwa wow wai ya kani ka thaw da em ka yalang wa tbian kawa pynlai da u P. Syiem, MPS Additional Superintendent of Police, West Jaiñtia Hills District, Jowai.
Ya ki ktien pdiang sñiawbha da yoh na ka J. Synnah, District Social Welfare Officer West Jaiñtia Hills District, Jowai kawa da pdiang sñiawbha ya waroh lang kiwa wan cha kani ka yalang khamtam ya u kongsan uwa da pyllait yei por wow emlang ha kani ka sngi.
Da batai ko leh kajiak chapang kani ka One Stop Center kawa man neibynta wow yarap ya ki manbei, ki khynnah kynthai kiwa em hapoh 18 snem kiwa chah lehbeiñ ha ki chnyrang næ ha kiwa hayung hasem, ha ka chnong ka thaw wa kiwi kiwi. I thmu kani ka One Stop Center toh wow e yarap ya ki kynthai wa chem chitom ha kiwa boon ki rukom.
Neiliang u kongsan da yaroh u ya kani ka One Stop Center kawa da em ha Jowai kawa man ka laad ka kabu ksiar ya ka jaitbru yong i wei da yooluti u wa deiwa em kani daw wanrah ko yei kylla ha ka chnong ka thaw yong i.
Kiwi de kiwa klam ha kani ka sngi toh ka R.D. Kynjing, District Child Protection Officer, Jowai, u B. Warjri District Commandant Home Guard, West Jaintia Hills District , Jowai wa na u Rev. HH Mohrmen.
Discussion about this post