Jowai: Ka sngi wa kyrpang ki kynthai wa tip leh kam ka International Women’s’ Day da leh warom ya ka ha ka 8 tarik uni u bnai ha Mooshrot Community Hall, Mooshrot wa pynman daka District Legal Service Authority, West Jaiñtia Hills waka District Social Welfare Department, West Jaiñtia Hills, wei da emlang u Chanky Lyngdoh kam u kongsan.
U kongsan hei klam yong oo da klam u chaphang ki kaam ka manbei ha ka juk wa katni wei da pynsñiaw u leh yei man kordor i man kynthai kawa man ka bei, ka kurim, ka khon, ka lok wa kawa yakrehlang kawa e chiboon chaka imlang sahlang.
Ka District Social Welfare Officer ka J. Synnah leh da klam ko ha kani ka sngi wei da khana ko yeiwa sdang ya kani ka sngi.
U D.S. Marbaniang, Secretary District Legal Service Authority da klam u hajrong ka phang ha uni u snem kawa ong “Think Equal, Build Smart, Innovate for change.” Da baan joor u yei emkaam wow ye u im katkam wa emkaam ki por neidaw wa ki kynthai toh kiwa pynwan dur wei man ki leh kam ka budloom ka manyung.
Da pynchlur u leh ya kiwa emlang ha kani ka sngi wa ym toh tieñ ki wow sdang thymme wei wow chimbynta ha kiwa boon ki kaam katwa ye i bor ki yow ye u wanrah yei kylla hapoh ka imlang sahlang.
Da pynkynmoo u leh ya ki kaam wa khroo wa da leh ki kynthai ha ki 100 snem wa da dep wei ha kini ki por wa katni leh dang emkaam chooh chooh ya ki kynthai wow leh ya ki kaam wa rap khroo chooh chooh.
Discussion about this post