Shillong: Ki Hat-trick na u Wallamsuk Nongkhlaw wa u Lalboi Kipjen da pynjop ki ya ka Smit waka Assam Rifles wei da psiah ki leh chaka Semifinal haka 4th Assam Rifles Invitational Football Tournament ynne ka sngi.
Haka yalehke Quarterfinal wa nyngkong wa pynman ha Laitkor, ka Smit da pynrem ko yaka Seven Brothers da 5-1 katwa ka Assam Rifles da jop suk ko yaka Mawpdang da 8-2.
Ka Smit da thap ko du chi kool haka kylla step lyngba u Banlongkhraw Kharbyngar haka minit wa soo, katwa haka kylla miet u Nongkhlaw da thap suk u haka minit wa 71, 74, 77 waka 90. Ka chi kool ka Seven Brothers da thap da u Bansharai Sun haka minit wa 80.
Ka Assam Rifles won haka yalehke ko waka Mawpdang haka kylla step da thap ko 5 kool katwa ka Mawpdang da thap ko 2 kool.
U Kipjen da thaap nyngkong u haka minit wa 7 wei hadien 3 minit da thap biang ka Assam Rifles lyngba u Jefferson Nongrud kawa da lai hadien wa toh ko na doh uwa yalehke ka Mawpdang.
Ka Mawpdang da yoh ko wow thaap ya ka kool haka minit wa 11 lyngba u Pyntip Syiem.
U Nongrud wa u Kipjen da krehlang ki wow thap e laad ya u Kipjen wow thaap u sa chi kool.
Haka 33 minit ka Mawpdang lyngba u Syiem da yoh ko u thap sa chi kool tangwa hadien 6 minit u Kipjen da thap biang u sa chi kool kawa pynkut ya ka kylla step 5-2 hadien wa toh thap bakla uwa yalehke ka Mawpdang.
Haka kylla miet ka Assam Rifles da thap ko sa le kool lyngba u Zuala (55′), IR Channa (85′) wa u Roger Singh (86′).
Mynstep daw pynman du ka wi ka yalehke kawa man leh ka Quarterfinal wa khaddooh hapyrdi ka Nongkrem waka Mawpat heipor 10:30 i step ha ka jooh ka madan.
Discussion about this post